KRYEFAQJA » LAJME » KOK-Hasani: Sportistët tanë synojnë edhe për medalje
KOK-Hasani: Sportistët tanë synojnë edhe për medalje

KOK-Hasani: Sportistët tanë synojnë edhe për medalje

Komiteti Olimpik i Kosovës ka bërë të ditur se cilët do të jenë tetë sportistët, që do të përfaqësojnë Kosovën në Lojërat Olimpike, Rio 2016. Presidenti i KOK-ut, Besim Hasani tha se kjo ngjarje është historike, pasi Kosova merr pjesë për herë të parë po në Lojërat Olimpike. Ai tha se është bërë një punë dhe angazhim i madh që sportistët tanë të paraqiten sa më mirë atje dhe shtoi se natyrisht synojnë edhe për medalje. Kosova tha ai, ka dy sportistë në Rio që shkojnë me normë olimpike, gjë që shumë shtete nuk mund ta arrijnë. Është e rëndësishme që sportistët tanë të tregojnë angazhim dhe prezantim të denjë, tha ai.

“Në vijim do i shpalos edhe emrat e sportistëve që do të marrin pjesë. E para është Majlinda Kelmendi, e cila merr pjesë në sportin e xhudos në kategorinë 52 kilogram dhe paraqitja e saj pritet të jetë më datën 7 gusht. Sportistja e dytë me normë olimpike është Nora Gjakova, në sportin e xhudos, në kategorinë 57 kilogramë, e cila do të paraqitet me 8 gusht”, tha Hasani. Ai tha se përveç Kelmendit e Gjakovës, do të marrin pjesë edhe të tjerë sportistë. Musa Hajdari do të marrë pjesë në atletikë në vrapimin 800 metra, ndërsa Viona Kryeziu, po ashtu në atletikë, në disiplinën 400 metra. Në sportin e notit, Lum Zhaveli do të marrë pjesë në disiplinën 50 metra, stil i lirë, ndërsa Drita Zeqiri, merr pjesë në disiplinën 100 metra në shpinë. Në Lojëra Olimpike do të marrë pjesë edhe Urata Rama, në sportin e qitjes, ndërsa çiklisti Qëndrim Guri, do të paraqitet më 7 gusht.

Ekipit kosovar në Lojëra Olimpike do t’i prijë Eugen Saraçini, i cili është shef i misionit. Ai ka bërë të ditur se tashmë janë përcaktuar ekipet, oraret, ndërsa udhëtimet do të fillojnë nga 28 korriku. KOK ka njoftuar se ka bërë të gjitha përgatitjet e nevojshme për një prezantim të suksesshëm në Lojëra Olimpike, Rio 2016, të cilat do të zhvillohen nga 5 deri me 21 gusht.