KRYEFAQJA » LAJME » Maqedoni, kriza politike, ndërpriten bisedimet mes partive
lideret-maqedoni

Maqedoni, kriza politike, ndërpriten bisedimet mes partive

Katër partitë nënshkruese të Përzhinës në Maqedoni ndërprenë një ditë më parë bisedimet, duke kërkuar kohë për konsulta shtesë. Ambasadori i BE-së, Aivo Orav tha se janë disa çështje të hapura për të cilat partitë kërkojnë më shumë kohë. “Ne mbaruam bisedimet sot. Katër partive u nevojitet më shumë kohë për konsultime brendapartiake dhe gjithashtu me Komisionin Shtetëror Zgjedhor. Koha është para. BE-ja është në gatishmëri t’ju ndihmojë me bisedimet”, u shpreh Aivo Orav, Ambasador i BE. Ambasadori i SHBA-së, Xhes Bejli, tha se po punohet intensivisht në zgjidhjen e krizës politike përmes zbatimit të Marrëveshjes së Përzhinës. Edhe partitë kanë komentuar ciklin e ri të bisedimeve për Përzhinën. Zëdhënësi i LSDM, Petre Shilegov akuzoi VMRO-DPMNE se po i shmanget zgjedhjeve të drejta dhe të lira. Nga VMRO-DPMNE theksojnë se arsyeja kryesore për ndërprerjen e takimit ndërmjet përfaqësuesve të katër partive politike ka qenë çështja e mediave. Nënkryetarja Teuta Arifi theksoi se BDI është e angazhuar në mënyrë aktive që të japë kontributin për dalje nga kriza. Edhe nga PDSH theksuan se po vazhdojnë konsultat brendapartiake për të shprehur më pas kërkesat e tyre në bisedimet e radhës për Përzhinën. Askush nga katër partitë nuk tregoi se kur do të vazhdojë raundi i radhës i bisedimeve, ku janë hapur çështjet si: pastrimi i listës zgjedhore, statusi i RTVM-së, zgjedhja e anëtarëve të Agjencisë për Shërbime Mediale Audio dhe Audiovizuale.