KRYEFAQJA » LAJME » Maqedoni, kriza politike, pasoja në ekonomi

Maqedoni, kriza politike, pasoja në ekonomi

Kryetari i sindikatës në Maqedoni vlerëson se do të rrezikohet hapja e vendeve të reja të punës nëse vazhdon kriza politike në vend. Sipas tij, komuniteti i biznesit në këtë periudhë ka qenë jashtëzakonisht i matur në veprime. “Sipas thirrjeve që kemi nga terreni, ishte e qartë se kjo krizë ka ndikuar në uljen e numrit të kontratave të nënshkruara, zvogëlimin e numrit të marrëveshjeve që pritet të nënshkruhen dhe të investimeve. Duket një lloj shqetësimi në pjesën e investimeve” , tha Zhivko Mitrevski, kryetar i LSM-së. Edhe nga Organizata e Punëdhënësve vlerësojnë se kriza politike ndikon në vendimin e investitorëve për të zgjeruar biznesin dhe të punësojnë njerëz të rinj. “Në këtë situatë të paqëndrueshme politike vendimet e tilla lihen për një kohë më të mirë. Ne kemi shembuj te disa partnerëve tanë, që së bashku me furnizuesit e tyre nga jashtë, kanë rënë dakord për blerjen e disa pajisjeve me normë të caktuar interesi. Tani nëse shkojnë t’i nënshkruajnë kontratat, norma e interesit prej 4% iu është rritur në 7%. Këto janë kostot e drejtpërdrejta shtesë për kompanitë për shkak të situatës politike”, deklaroi Angel Dimitrov, kryetar i Organizatës së Punëdhënësve të Maqedonisë. Sindikata dhe komuniteti i biznesit u bëjnë thirrje faktorëve politikë që sa më shpejti të gjejnë zgjidhje për krizën, hap që do të kontribuojë në normalizimin e proceseve ekonomike.