KRYEFAQJA » LAJME » Maqedoni, Kuvendi në seancë të jashtëzakonshme

Maqedoni, Kuvendi në seancë të jashtëzakonshme

Kryetari Kuvendit, Trajko Veljanovski ka thirrur një seancë të jashtëzakonshme, në të cilët pritet të vendoset për anulimin e datës së zgjedhjeve të caktuara për 5 qershor. Ndërkohë, BDI ka paraqitur një nismë për ndryshimin e kodit zgjedhor që parasheh anulimin e datës së zgjedhjeve, por pa kërkuar një datë të re për mbajtjen e tyre. Pas vendimit të Gjykatës Kushtetuese të Maqedonisë për pezullimin e vendimit për shpërbërjen e Kuvendit, shpalljen e zgjedhjeve më 5 qershor, si dhe të gjitha vendimet tjera të miratuara nga Komisioni Shtetëror i Zgjedhjeve, në njoftimin me shkrim të kryeparlamentarit Veljanovski, thuhet: “Dua të shpreh bindjen time se zhvillimi i mëtejshëm i proceseve demokratike në Maqedoni mund të realizohet në Kuvendin e Maqedonisë prandaj ftoj të gjithë deputetët që pavarësisht përcaktimit politik të marrin pjesë aktive në punimet e Kuvendit”.Nisma e Bashkimit Demokratik për Integrim ka pasuar vendimin e VMRO-DPMNE-së, së Nikolla Gruevkit që e vetme të shkojë në zgjedhjet e 5 qershorit. Opozita maqedonase e udhëhequr nga Lidhja Social Demokrate, e Zoran Zaevit dhe dy partitë shqiptare BDI dhe PDSH kishin vendosur bojkotin e zgjedhjeve për shkak të mos përmbushjes së kritereve të parapara me marrëveshjen politike të vitit të kaluar. Nga Lidhja Social Demokrate thonë se vendimi i gjykatës krijon një përshtypje se gjoja po hapen dyert për zgjidhjen e krizës. Sipas LSDM-së, vendimi i gjykatës edhe njëherë konfirmon se “vendimet e gjykatës i shkruan lideri i VMRO DPMNE-së, Nikolla Gruevski”. Opozita ka përsëritur kërkesën kryesore të saj për anulimin e vendimit të presidentit për faljen e zyrtarëve të inkriminuar, shtyrjen e zgjedhjeve dhe caktimin e tyre vetëm pasi të jetë përmbushur kriteret për zgjedhje të lira dhe demokratike.