KRYEFAQJA » LAJME » Rama falenderon: Socialistët më kanë mirëkuptuar e mbështetur plotësisht!
Rama falenderon për referendumin: Socialistët më kanë mirëkuptuar e mbështetur plotësisht!

Rama falenderon: Socialistët më kanë mirëkuptuar e mbështetur plotësisht!

Kryetari i PS Edi Rama ka zgjedhur Fejsbukun për të përcjellë “Mirënjohje e thellë për familjen tonë të madhe politike që sot dha një provë shumë kuptimplotë të vetëdijes dhe angazhimit demokratik”. Sipas tij “Referendumi kaloi pritshmëritë për pjesëmarrjen falë angazhimit të të gjitha gjeneratave të socialistëve”. “I falenderoj me dashuri dhe respekt që të gjithë, nga 90 vjeçarët që ishin dëshmia më emocionuese përpara kutive të votimit, deri tek 16 vjeçarët që janë dëshmitarët më të rinj, të të parit referendum partiak në Shqipërinë e këtyre 25 vjetëve” shkruan udhëheqësi socialist.
Për zotin Rama “Referendumi i sotëm ishte një ushtrim demokratik e organizativ plotësisht i suksesshëm. I cili rrit energjitë pozitive të akumuluara në familjen tonë të madhe gjatë procesit nëntë mujor të hapjes, zgjerimit e fuqizimit të partisë”. Sipas kreut socialist “Ky proces do të vazhdojë pa u ndalur prej ditës së hënë, për të realizuar objektivin e 150 mijë anëtarëve në ditën e 25-vjetorit të lindjes së Partisë Socialiste”.
Në vlerësimin e kryetarit Rama, rezultati i referendumit tregon se “anëtarët e familjes sonë politike … e kanë mirëkuptuar e mbështetur plotësisht mosmbajtjen e zgjedhjeve për kryetar partie pas marrjes së detyrës së kryeministrit nga ana ime”. “Por, shton ai, referendumi i sotëm, e konfirmoi katërcipërisht bindjen tonë, ashtu sikundër mbështeti me një “PO” shumë të fuqishme, vendimin e kongresit të ri për ndryshimin përkatës në statutin e Partisë Socialiste, lidhur me mandatin e kryetarit kur ky i fundit ka edhe detyrën e kryeministrit”.
“Kjo ditë na dha të gjithëve një arsye më shumë për të qenë krenarë për Partinë Socialiste, ndërsa mua vetë edhe një arsye më shumë për t’i shërbyer me mish e me shpirt familjes sonë të madhe politike, në radhë të parë duke e bërë me ndershmëri, përkushtim e dinjitet, detyrën e lartë të Kryeministrit të Shqipërisë. FALEMINDERIT TË GJITHËVE” e përfundon mesazhin e tij kreu socialist dhe kryeministri Edi Rama.