KRYEFAQJA » LAJME » Rama: Himara është shqiptare
Rama: Himara është shqiptare

Rama: Himara është shqiptare

Shkëmbimi i deklaratave mes MPJ të Greqisë dhe MPJ të Shqipërisë lidhur me ngjarjet e ditëve të fundit në Himarë, ku disa banorë të saj po kundërshtojnë prishjen e banesave të tyre për ti hapur rrugë zbatimit të një projekti urbant, po ndiqet me vemendje edhe nga kryeministri Edi Rama. Ai ka zgjedhur gjuhën e artit dhe historisë, për të përcjellur mesazhet e tij. Në rrjetin social Fejsbuk ai ka botuar një Gravurë të Athinës së shekullit të XVII, me komentin e mëposhtëm. “Kjo gravurë e vjetër e Athinës e 1670 (qytet në të cilin, shkruante ende më 1925 princi grek fanariot Eugene Rizo-Rangabe, “…popullsia autoktone është edhe sot e kësaj dite kryesisht shqiptare”), na kujton, ndër të tjera se, nëse Akropoli i lashtë është ende në këmbë për lavdi të njerëzimit dhe qytetërimit, kjo i detyrohet edhe kurajos dhe vizionit të primatit shqiptar të Athinës, Gjergj Dushmanit! I cili, më 1686, negocioi me flotën veneciane të Francesco Morosinit që qyteti të mos bombardohej prej limanit të Falerës, edhe pse aty ndodhej një garnizon turk.
Një histori e tillë e një qyteti që dikur ishte sipas historianëve e dëshmive autentike, qytet kryesisht shqipfolës, nuk e bën absolutisht atë një qytet shqiptar, edhe pse shqiptarëve Athina diçka u ka borxh në historinë e saj të jashtëzakonshme. Dhe, tamam po kështu, nëse Himara përjetoi me arqipelagët grekë dhe greqishten si “lingua franca” të Orientit, nëpërmjet shkëmbimeve detare, një bashkëjetesë të afërt e të frytshme, kjo nuk e bën atë absolutisht një krahinë greke; aq më shumë që popullsia e saj, në të gjithë aktet ndërkombëtare, për të mos folur veç për Historinë, njihet thjesht e vetëm si SHQIPTARE” shkruan kryeministri Edi Rama.