KRYEFAQJA » LAJME » Rama në Vjenë për emigrantët: Jemi gati të marrim pjesë në këtë përpjekje europiane
Rama në Vjenë për emigrantët: Jemi gati të marrim pjesë në këtë përpjekje europiane

Rama në Vjenë për emigrantët: Jemi gati të marrim pjesë në këtë përpjekje europiane

Kryeministri Edi Rama ka shprehur gatishmërinë e Shqipërisë për të qenë pjesë e një zgjidhjeje të përbashkët mes vendeve Ballkanike dhe atyre europiane për çështjen e refugjatëve. Deklaratën e tij ai e bëri në Samitin “Migrimi përgjatë rrugës ballkanike” në Vjenë, i ftuar nga kancelari austriak Christian Kern. “Shqipëria ka pozicionin e saj të qartë qysh në fillim, jemi gati të marrim pjesë në këtë përpjekje, nëse kjo është e përbashkët, e mirëorganizuar, e koordinuar dhe e ndershme për të gjitha vendet” tha zoti Rama. Ai përsëriti qëndrimin tashmë të njohur se “Shqipëria as mund të çeli kufijtë e të nxjerrë gjoksin përpara, as nuk sillet si disa vende që faktikisht tradhtojnë vlerat e parimet e Bashkimit Europian, kur flasin dhe i qasen çështjes së refugjatëve” .
Zoti Rama e vlerësoi Samitin edhe si një rast për të dëshmuar forcimin e reputacionit të Shqipërisë.
“Nga ana tjetër ishte një rast shumë i mirë për të parë, edhe në sensin e marrëdhënieve tona me të tjerët, forcimin e reputacionit të vendit tonë si një vend ku ka një vullnet të gjithëpranuar botërisht për reformën në drejtësi, për luftën kundër krimit, kundër trafiqeve dhe kundër korrupsionit. Kjo ishte nota pozitive për mua dhe shpresoj shumë të marrim atë që na takon mbas gjithë kësaj pune të madhe që kemi bërë, rekomandimin për hapjen e negociatave me Bashkimin Europian, që na fut në një fazë të re gjatë mandatit të dytë të qeverisjes.”
Samiti “Migrimi përgjatë rrugës ballkanike” bashkoi në një diskutim të përbashkët për çështjen e refugjatëve, kryeministrat e vendeve të Ballkanit, kancelarin austriak Christian Kern, kancelaren gjermane Angela Merkel, kryeministrin e Hungarisë Victor Orban, të Sllovenisë Miro Cerar, si dhe Presidentin e Këshillit Europian, Donald Tusk.