Disa deputetë të Kuvendit në adresat zyrtare elektronike, më 23 korrik, kanë marrë mesazhe me përmbajtje kërcënuese – ka njoftuar MPB-ja.

Kryetari i Kuvendit të Maqedonisë së Veriut, Afrim Gashi bëri të ditur se deputetët e BDI-së kanë marrë mesazhe elektronike me kërcënime nga një dërgues i panjohur, shkruan media vendas.

Gashi kërkon që institucionet kompetente të hetojnë incidentin dhe zbulojnë personat që qëndrojnë pas këtyre kërcënimeve.

“Kryetari i Kuvendit dënon ashpër çdo formë kërcënimi, tentativë për dhunë apo nxitje për dhunë. Deputetët zgjidhen drejtpërdrejt nga qytetarët dhe liria e fjalës është e pacenueshme, ajo nuk duhet të kërcënojë lirinë e të tjerëve. Anonimiteti në dërgimin e mesazheve të tilla ose në mediat sociale mund t’i japë dërguesit ndjenjë mosndëshkimi, por duhet të pranojmë që institucionet tona janë aktive dhe të afta. Kryetari Gashi është i bindur se dërguesi do të identifikohet dhe sanksionohet”, thuhet në reagimin e kabinetit të kreut të kuvendit.

I menjëhershëm ka qenë dhe reagimi i koalicioni Aleanca për Shqëiptarët që dënon ashpër kërcënimet në adresë të deputetëve shqiptarë në Kuvendin e Republikës së Maqedonisë së Veriut.

Mesazhet e këtilla kërcënuese janë edhe nxitje e urrejtjes dhe dhunës, ndërsa paraqesin rrezik të drejtpërdrejtë për jetën e deputetëve dhe të çdo qytetari në vend.

Heshtja dhe mosndëshkime i veprimeve të këtilla paraqet inkurajim për personat që kësaj radhe kanë guxuar të kërcënojnë me shkrim, ndërsa nesër mund të guxojnë edhe të veprojnë.

Relativizimi i kërcënimeve të këtilla le hapësire për tu inkurajuar grupet kriminale dhe nacionaliste në vend.

Një motiv shtesë për këto veprime paraqet edhe qasja nacionaliste e Qeverisë, gjuha e ashpër që ka filluar të përdoret ndaj shqiptarëve edhe nga eksponentë politik maqedonas dhe indiferenca totale e partive shqiptare në Qeveri të cilët as këtë rast nuk e shohin të udhës ta dënojnë dhe të veprojnë institucionalisht.

Ftojmë organet e rendit që të zbardhin këtë rast, kërcënuesit të zbulohen dhe të sanksionohen dhe të dërgohet porosi që do të parandalojë dhunën sa është ende në fazën e retorikës verbale” – thuhet në kumtesën e AleancëS për Shqiptarët.

/rtsh.al/