Dyshimet për shpërdorim detyre në Klinikën e Onkologjisë pritet të nxjerrin sot në protestë qytetarët e Maqedonisë së Veriut.

Prokuroria dhe policia mësynë javën e kaluar në klinikë pas indicieve se stafi prej vitesh ka përvetësuar ilaçet, që ishin destinuar për personat e sëmurë me kancer, për t’i shitur ato në tregun e zi.

Skandali u zbulua nga javorja maqedonase “Fokus” në muajin maj, e cila raportoi për mungesën e terapisë me citostatikë.

Drejtuesi ekonomik i repartit dyshohet se ka krijuar lista false të pacientëve me kancer, duke përfshirë edhe të afërmit e tij, në mënyrë që t’ua shiste atyre barnat speciale.

“Prokuroria Themelore Publike e Shkupit dhe Ministria e Punëve të Brendshme vazhdojnë me procedurën parahetimore, të iniciuar në bazë të pretendimeve në tekstet e një gazete javore lidhur me punën e Klinikës së Onkologjisë. Kontrollet bëhen me qëllim të sigurimit të provave për ekzaminimin e shenjave të mundshme të veprës penale,” njoftoi Prokuroria Publike.

Protesta para qeverisë është planifikuar në orën 18:00 dhe protestuesit kërkojnë dorëheqjen e ministrit të Shëndetësisë, Fatmir Mexhiti, dhe të paraardhësve Venko Filipçe dhe Bekim Sali.

“Brutaliteti i pushtetit çdo ditë sjell viktima të reja, viktima të kësaj radhe janë pacientët e Klinikës së Onkologjisë të cilët kanë pritur me muaj në gjendje të rrezikshme për jetën, ndërsa barnat kanë përfunduar në tregun e zi në Kosovë. Bëhet fjalë për krimin e organizuar që përfshin zyrtarët më të lartë të qeverisë dhe ka vite që vazhdon. Ne nuk pranojmë përgjegjësi nga niveli më i ulët në Onkologji – kërkojmë përgjegjësi penale për qeveritarët,” thuhet në thirrjen për protesta.

/rtsh.al/