Ka një lajm të mirë për të gjithë nostalgjikët e kinemasë “Agimi”, e cila tashmë hap dyert sërish për publikun, por kësaj radhe e rivitalizuar, si një qendër moderne multifunksionale.

Në hapësirën më të re artistike të qytetit, nuk do të shijojmë vetëm një film, por koncepti i ri me të cilin është ndërtuar “Qendra e Artit Agimi”, me disa salla të vogla, i jep mundësinë të gjithëve të rinjve të shfrytëzojnë këto ambiente edhe për ekspozita, vënien në skenë të pjesëve teatrale, koncerte, workshope, e një sërë aktivitetesh të tjera, që si kryefjalë kanë artin dhe kulturën.

Agjencia e Industrisë Kreative, e cila ka marrë përsipër rivitalizimin e kësaj ndërtese, është institucioni më i ri në varësi të Bashkisë Tiranë, i cili ka si qëllim kryesor zhvillimin e industrisë, sipërmarrjes dhe ekonomisë krijuese, si dhe ketë një ndikim pozitiv në fushën e artit, të filmit, kinemasë, arkitekturës, prodhimeve audio vizuale, të rekreacionit dhe të teknologjisë.

/rtsh.al/