Në një mbrëmje të veçantë artistike, të zhvilluar në Kinema “Republika”, u nderua figura e aktorit të shquar, lindur në Shkodër, Mirush Kabashi, me titullin simbolik “Një ditëlindje pa Mirushin”.

Në kuadër të aktivitetit u hap një ekspozitë fotografike me titullin “Mes teatrit dhe filmit”, u promovua libri dygjuhësh “Mirush Kabashi, Sokrati Shqiptar” i autores Driada Dervishi, si dhe u shfaq dokumentari “100 maska, 1 shpirt”, i regjisorit Elidor Markja.

Në intervistë për mediet, regjisorja Driada Dervishi foli për vlerat e pazëvendësueshme që Mirush Kabashi la në artin skenik shqiptar.

“Mendoj që fokusi dhe reflektimi mbi figurën e madhe që Mirushi ishte vjen nëpërmjet thënieve të shumta, intervistave të ndryshme të marra në momente të caktuara, nga teatrologë, aktorë, regjisorë të njohur ndërkombëtarë,” tha autorja e librit, znj. Dervishi.

Menda Kabashi, vajza e aktorit të ndjerë, u shpreh se prania e tij ndihet çdo ditë në kujtimet dhe krijimtarinë artistike që realizoi.

“… dyfish e emocionuar, pasi Shkodra është edhe vendi ku im atë lindi dhe ka një kuptim të veçantë të transmetojmë dokumentarin, librin, monografinë dhe të kemi Shkodrën të pranishme këtu,” u shpreh vajza e aktorit të ndjerë.

Ky aktivitet u zhvillua me mbështetjen e Bashkisë Shkodër dhe institucioneve të kulturës në vend.

Gazetar: Marjo Gjini

/rtsh.al/