Ambasadori i Shqipërisë në Maqedoninë e Veriut, Denion Meidani, ka reaguar ashpër ndaj incidentit racist të ndodhur në Kumanovë, gjatë një ndeshjeje basketbolli.

Në një deklaratë publike, ai theksoi se gjuha e urrejtjes nuk ka vend në sport dhe shoqëri, duke e cilësuar ngjarjen si një “alarm” për të gjithë.

Ambasadori Meidani kërkoi një reagim të fortë dhe të qartë nga autoritetet më të larta të Maqedonisë së Veriut. “Bashkëjetesa kërkon angazhim të përditshëm, respekt për rregullat e lojës dhe për njëri-tjetrin — jo vetëm në tribuna, por kudo,” shkroi ai.

Përmbajtja e thirrjeve raciste

Gjatë ndeshjes, tifozët brohoritën kore raciste dhe fyese ndaj shqiptarëve, si:

“Le ta kuptojnë shqiptarët e mallkuar, emri maqedonas nuk do të zhduket. Maqedoni e pastër, e pastër, e pastër.”

“Shqiptari i mirë është shqiptari i vdekur.”

“Dhoma e gazit për shqiptarët,” një referencë e tmerrshme ndaj krimeve të Luftës së Dytë Botërore.

Këto thirrje u dëgjuan gjatë gjithë ndeshjes, duke shkaktuar zemërim dhe shqetësim të gjerë.

/rtsh.al/