Shërbimi i hemodializës në qytetin e Korçës vijon të jetë një nga shërbimet më të rëndësishme dhe jetike për pacientët që vuajnë nga sëmundjet kronike të veshkave. Aktualisht 120 pacientë po marrin këtë shërbim, i cili ofrohet me aparatura moderne dhe nën kujdesin e stafit mjekësor të specializuar.

“Shumica janë pacientë rezident nga zona e Devollit, Pogradecit, Korçës. Kemi edhe pacientë sezonal kur vijën këtu për pushime dhe kur kanë seancat e hemodializës e realizojnë këtu. Qendrat e dializës në vend janë të disa rajone në Shkodër, Lezhë, Korçë, Vlorë dhe Tiranë me aparatura moderne.”, u shpreh mjeku nefrolog Joan Kosta.

Ky shërbim siguron trajtim të rregullt dhe të sigurt për pacientët që kanë nevojë për pastrimin e gjakut për shkak të pamjaftueshmërisë renale, duke ndihmuar në përmirësimin e cilësisë së jetës së tyre.

“Secili pacientë realizon 2-3 seanca në javë, bëhen kontrolle periodike dhe konsulta me specialiste”, tha mjeku

Kujdesi i vazhdueshëm, monitorimi profesional dhe kushtet e përshtatshme në qendrën e hemodializës bëjnë që pacientët të marrin trajtim të standardeve bashkëkohore pranë vendbanimit të tyre, pa qenë e nevojshme të udhëtojnë drejt qyteteve të tjera.

Gazetare: G. Manushi

/rtsh.al/