Drejtoresha e Përgjithshme e RTSH-së, Eni Vasili, në fjalën e saj në Komisionin për të Drejtat e Njeriut dhe Mjetet e Informimit Publik, gjatë seancës dëgjimore për projektbuxhetin 2026 me Këshillin Drejtues të Radiotelevizionit Shqiptar shpjegoi arsyet pse institucioni kërkon rritje të financimit buxhetor për vitin e ardhshëm.

Vasili deklaroi se në realizimin e buxhetit 2025 (janar–tetor), totali i shpenzimeve nga financimi buxhetor është realizuar në masën 80%, ndërsa fondi për prodhimet filmike është realizuar vetëm 14%, por sipas saj kjo do të përmbyllet plotësisht deri në fund të vitit, pasi muaji në vijim mbulon ngjarjet kryesore si Festivali i 64-t i Këngës në RTSH, Junior Song dhe programet e fundvitit.

Drejtoresha e Përgjitshme e RTSH shtoi ndërkaq se fondi për orkestrën simfonike, kinematografinë dhe projektet teknike pritet të shpenzohet në nëntor–dhjetor, ndërsa fondi investues prej 100 milion lekësh për 2025 është plotësisht i planifikuar dhe me procedura të mbyllura.

“Pr.Buxheti 2026- totali i financimit është parashikuar në vlerën 890 mln lekë pothuaj aq saishte fondit për vitin 2025 bile diçka e vogël më pak.

Rritja prej 44 mln lekë për 2026 më shumë se në 2025 për Orkestrën simfonike të RTSH dhe kinematografisë është rrjedhojë e rritjes së pagave për orkestrën simfonike në tetor 2025.

Për programin shërbimi për shqiptarët jashtë kufirit dhe shërbimi për publikun në gjuhë të huaj rritje prej 5 mln lekë në 2026.

Është ulur fondi i investime, 50 mln lekë më pak se 2025.

Situata e të ardhurave në RTSH- të ardhurat vjetore maksimale në RTSH nuk shkojnë më shumë se 2.2 mld lekë. Struktura e të ardhurave: 59% nga tarifa e aparatit transmetues , 32% financim i buxhetit të shtetit dhe 9% të ardhura të tjera.

Problemi kryesor sipas nesh i financimit buxhetor- ka mbetur i njëjtë të paktën një dekade. Tarifa e aparatit nuk është indeksuar prej 10 vitesh ndërsa kostot janë rritur ndjeshëm”, deklaroi Vasili.

Vasili bëri me dije se të ardhurat vjetore të RTSH-së nuk mund të shkojnë më shumë se 2.2 miliardë lekë, të ndara si më poshtë: 59% nga tarifa e aparatit transmetues; 32% financim nga buxheti i shtetit; 9% të ardhura të tjera. Ajo theksoi se tarifa e aparatit transmetues nuk është indeksuar prej 10 vitesh, ndërkohë që kostot operative janë rritur ndjeshëm.

Sipas drejtueses së RTSH-së, arsyeja kryesore është se institucioni nuk mund t’i mbulojë më kostot me të ardhurat aktuale, sikurse: rritja e kostove operative, nevoja për modernizim dhe digjitalizim të teknologjive, rritja e kërkesës për përmbajtje digjitale dhe ndërkombëtare, nevoja për bashkëprodhime artistike dhe filmike, shpenzime kapitale që nuk mbulohen dot vetëm nga të ardhurat e RTSH-së.

/rtsh.al/