Shqipëria hedh hapa konkretë drejt modernizimit të shërbimit onkologjik, duke synuar standarde evropiane në trajtimin e sëmundjeve tumorale. Ministrja e Shëndetësisë, Evis Sala, njoftoi sot një bashkëpunim të rëndësishëm strategjik me Italinë, pas një takimi të zhvilluar me Prof. Ruggero De Maria, Presidentin e Aleancës Kundër Kancerit në shtetin fqinj.

Përmes një reagimi zyrtar në platformën X, ministrja Sala e cilësoi takimin si të shkëlqyer, duke nënvizuar se fokusi kryesor mbetet përmirësimi rrënjësor i ciklit të kujdesit për pacientët: nga parandalimi, te diagnostikimi e deri te trajtimi i specializuar.

Katër shtyllat e reformës onkologjike

Në qendër të diskutimit mes ministres Sala dhe profesorit De Maria ishin planet ambicioze të Shqipërisë për ristrukturimin e shërbimit ndaj pacientëve me tumore. Ministrja zbardhi katër prioritetet kryesore që pritet të transformojnë këtë sektor:

Krijimi i Rrjetit Kombëtar Onkologjik, një strukturë e integruar për menaxhimin e sëmundjes në të gjithë vendin.

Ngritja e Institutit Kombëtar të Tumoreve, një qendër ekselence e dedikuar posaçërisht studimit dhe kurimit të kancerit.

Standardizimi i protokolleve, me unifikimin e mënyrës së trajtimit sipas praktikave më të mira ndërkombëtare.

Zgjerimi i aksesit në trajtime innovative, duke përfshirë terapitë e reja klinike për pacientët shqiptarë.

Fokusi te Evropa dhe inovacioni

Gjatë takimit, u theksua rëndësia e bashkëpunimit me partnerët ndërkombëtarë për të sjellë në Shqipëri ekspertizën më të mirë perëndimore.

“Diskutimi ynë u fokusua te përpjekjet e vazhdueshme të Shqipërisë për të përmirësuar më tej parandalimin, trajtimin dhe kujdesin për sëmundjet tumorale,” shkruan Sala në postimin e saj.

Ajo shtoi se vizioni i ministrisë është ndërtimi i një sistemi modern, të aksesueshëm dhe mbi të gjitha, të bazuar në fakte shkencore që garantojnë rezultate më të mira për qytetarët.

“Presim me padurim thellimin e bashkëpunimit me partnerët kyç evropianë,” përfundoi ministrja, duke dhënë mesazhin se reforma në onkologji do të jetë një nga prioritetet kryesore të mandatit të saj, me mbështetjen e drejtpërdrejtë të ekspertizës italiane dhe asaj të Bashkimit Evropian.

/rtsh.al/