E Ngarkuara me Punë e SHBA, Nancy VanHorn ka zhvilluar një takim me kreun e SPAK, Klodjan Braho, dhe kreun e BKH Joni Keta, duke i përgëzuar për rolet e tyre te reja drejtuese. Takimi u zhvillua në ambientet e Prokurorisë së Posaçme, ku VanHorn takoi edhe ish-kreun e SPAK, Altin Dumani si edhe prokurorë të tjerë.

VanHorn ritheksoi mbështetjen e SHBA-së për përpjekjet e SPAK në luftën kundër krimit të organizuar dhe trafikut të narkotikëve, duke nënvizuar rëndësinë e bashkëpunimit të ngushtë në këtë fushë.

Në këtë kuadër, u rikujtua edhe deklarata e Sekretarit Rubio se SHBA do të përballet me kartelet e drogës “kudo që ndodhen dhe kudo që veprojnë kundër interesave të Shteteve të Bashkuara”.

“E Ngarkuara me Punë Nancy VanHorn përgëzoi Kryeprokurorin e Posaçëm të SPAK Klodjan Braho, dhe Kreun e BKH Joni Keta për rolet e tyre të reja drejtuese, duke ritheksuar mbështetjen e Shteteve të Bashkuara për përpjekjet e SPAK në luftën kundër krimit të organizuar dhe trafikut të narkotikëve. Siç ka deklaruar Sekretari Rubio: “Ne do të përballemi me kartelet e drogës kudo që ndodhen dhe kudo që veprojnë kundër interesave të Shteteve të Bashkuara. Detyrimi kryesor i presidentit është të sigurojë interesin kombëtar dhe sigurinë kombëtare të popullit tonë.” Së bashku, ne qëndrojmë të bashkuar në luftën kundër krimit ndërkombëtar”, thuhet në postimin e Ambasadës Amerikane.

/rtsh.al/