Institucionet vendore në Durrës kanë reaguar pas sensibilizimit për situatën e vështirë të 33- vjeçares B. B dhe tre fëmijëve të saj.

Drejtoria e Shërbimit Social pranë Bashkisë së Durrësit njoftoi sot marrjen e një sërë masash emergjente dhe afatgjata për të nxjerrë familjen situata e vështirë sociale dhe ekonomike.

Vendimet u morën pas një mbledhjeje urgjente të Grupit Teknik Ndërsektorial (GTN), ku morën pjesë përfaqësues të Shërbimit Social, Policisë, Shëndetësisë dhe Organizatave Jo-Qeveritare, Policia, Shëndetësia dhe institucione të tjera ku u vendos që familjes t’i ofrohet ndihmë e menjëhershme.

Sakaq tre fëmijët do të dërgohen urgjentisht në spital, ndërsa do të sigurohen veshmbathje dhe medikamente të nevojshme për trajtimin e tyre.

Po ashtu, do të kryhet pastrimi dhe dezinfektimi i banesës, me financim nga organizatat ARSIS dhe World Vision.

Ndërkohë, familja do të ndihmohet për transferimin e regjistrimit në gjendjen civile nga Vau i Dejës, ku aktualisht rezultojnë të regjistruar, në qytetin e Durrësit. Pas këtij transferimi, Bashkia e Durrësit do ta përfshijë familjen në listën e përfituesve për strehim social.

Për nënën, nëpërmjet Zyrës së Punës, do të ofrohet një punësim dinjitoz me orar 8-orësh, në mënyrë që të ketë mundësi të kujdeset dhe të mirërrisë fëmijët e saj. Gjithashtu, asaj do t’i ofrohen kurse prindërimi dhe këshillim psikologjik.

Shërbimi Social do të kryejë kontrolle dhe mbikëqyrje të përditshme për mbarëvajtjen e familjes, ndërsa nëna do të jetë nën një masë prove për të vlerësuar aftësinë e saj për të mbajtur kujdestarinë e fëmijëve.

Masat e marra përfshijnë:

Krijimin e kushteve higjieno-sanitare përmes dezinfektimit të banesës nga “Nisma ARSIS”;

Pagesën dhe mbulimin me medikamente nga ARSIS;

Vendosjen e masës së mbikëqyrjes së specializuar në familje;

Ofrimin e kurseve të prindërimit nga “Nisma ARSIS”;

Këshillim psikologjik për nënën dhe fëmijët nga “Nisma ARSIS”;

Sigurimin e veshmbathjeve për tre fëmijët nga “World Vision”;

Ofrimin e pakove ushqimore dhe higjieno-sanitare nga “Nisma ARSIS”;

Orientimin e nënës për transferimin në gjendjen civile në Durrës, me qëllim përfitimin e shërbimeve sociale, aplikimin për fondin e veçantë, strehim social ose bonus qiraje.

/rtsh.al/