Këshilli i Emërimeve në Drejtësi (KED) për vitin 2026 ka nisur zyrtarisht punën ditën e sotme, duke mbajtur mbledhjen e parë në ambientet e Gjykatës së Lartë. Nën drejtimin e Kryetarit Ilir Panda, organi i ri u konstituua dhe hodhi menjëherë shortin për ndarjen e dosjeve të kandidatëve që garojnë për vendet vakante në Gjykatën Kushtetuese.

KED, i zgjedhur me short nga Presidenti i Republikës, përbëhet nga 9 anëtarë, përfshirë prokurorë dhe gjyqtarë nga të gjitha nivelet.

Shorti për kandidatët

Fokusi kryesor i mbledhjes ishte caktimi i relatorëve (anëtarëve që do të bëjnë verifikimin) për dy vakancat në Gjykatën Kushtetuese: njëra e shpallur nga Presidenti dhe tjetra nga Kuvendi.

Për vakancën e Presidentit, relatorë u caktuan anëtarët Afërdita Ndoi, Alfred Progonati dhe Ornela Naqellari, të cilët do të shqyrtojnë dosjet e kandidatëve Arta Vorpsi, Naureda Llagami, Jordan Daci, etj.

Ndërsa për vakancën e Kuvendit, relatorë do të jenë sërish Afërdita Ndoi e Alfred Progonati, të cilëve u bashkohet edhe Klodiana Veizi.

Në përfundim të mbledhjes, KED theksoi se shpejtësia e procesit varet nga bashkëpunimi ndërinstitucional. Këshilli u bëri thirrje institucioneve publike dhe private që t’u përgjigjen pa vonesa kërkesave për informacion mbi figurën dhe pasurinë e kandidatëve.

Më poshtë është ndarja e plotë e dosjeve sipas shortit të sotëm:

1. Për vakancën e shpallur nga Presidenti (30.10.2025):

Relatore Afërdita Ndoi verifikon: Arta Vorpsi, Brunilda Bara, Genci Gjonçaj.

Relator Alfred Progonati verifikon: Lulzim Hamitaj, Jordan Daci, Naureda Llagami, Roland Ilia.

Relatore Ornela Naqellari verifikon: Alaudin Malaj, Alban Toro.

2. Për vakancën e shpallur nga Kuvendi (10.12.2025):

Relatore Afërdita Ndoi verifikon: Arta Vorpsi, Genci Gjonçaj.

Relatore Klodiana Veizi verifikon: Fatmira Luli, Helena Papa, Lulzim Karini.

Relator Alfred Progonati verifikon: Jordan Daci, Lulzim Hamitaj, Naureda Llagami, Roland Ilia.

Përbërja e plotë e KED 2026

Kryetar i KED është Ilir Panda. Anëtarë të tjerë janë: Fiona Papajorgji dhe Marjana Semini (Kushtetuese), Alfred Progonati (Prokuroria e Përgjithshme), si dhe Ornela Naqellari, Iliriana Olldashi, Altin Binaj, Afërdita Ndoi dhe Klodiana Veizi nga Gjykatat e Apeleve dhe ato Administrative.

/rtsh.al/