Ndërsa retorika publike në Evropë është e ashpër kundër ambicieve të Presidentit amerikan Donald Trump për të blerë Groenlandën, prapaskenat diplomatike tregojnë një realitet krejt tjetër. Në një lëvizje të papritur që thyen traditat diplomatike, Trump publikoi të martën mesazhet private të marra nga Presidenti francez Emmanuel Macron dhe kreu i NATO-s, Mark Rutte.

Mesazhet zbulojnë një gjuhë shumë më të butë dhe miqësore sesa qëndrimet zyrtare, duke ngritur perden mbi mënyrën se si liderët botërorë menaxhojnë marrëdhëniet me presidentin amerikan.

“Miku im” – strategjia e Macron

Mesazhi i Macron, vërtetësia e të cilit u konfirmua nga zyra e tij, nis me fjalët “Miku im”. Përpara se të prekte temën e nxehtë të Groenlandës, presidenti francez u sigurua të theksonte pikat e përbashkëta.

“Jemi plotësisht dakord për Sirinë. Mund të bëjmë gjëra të mëdha për Iranin,” shkruan Macron në anglisht, përpara se të kalojë te çështja delikate: “Nuk e kuptoj çfarë po bëni në Groenlandë. Le të përpiqemi të ndërtojmë gjëra të mëdha.”

Kjo qasje ndryshon dukshëm nga kritikat e hapura që Franca dhe aleatët e tjerë kanë shprehur për përpjekjen e SHBA-së për të marrë kontrollin e territorit danez.

Shefi i NATO-s në pozicion delikat

Trump nuk u ndal me kaq. Ai publikoi edhe një mesazh nga Sekretari i Përgjithshëm i NATO-s, Mark Rutte, i cili publikisht ka refuzuar të komentojë krizën e Groenlandës.

“Jam i përkushtuar për të gjetur një rrugë përpara në çështjen e Groenlandës. Mezi pres të të shoh. I yti, Mark,” shkruhej në mesazhin e Rutte.

Kjo bie në kontrast me heshtjen e tij publike përballë paralajmërimeve të Danimarkës se veprimet e njëanshme të SHBA-së mund të kërcënonin ekzistencën e NATO-s.

Surpriza, një darkë me Rusinë dhe Ukrainën në Paris?

Ndoshta detaji më intrigues i zbuluar nga kjo “rrjedhje” informacioni nga vetë Trump, është propozimi i Macron për një takim të nivelit të lartë në Paris. Në mesazh, Macron sugjeron ftesën e përfaqësuesve nga Ukraina dhe Rusia “në margjina” të një takimi, një ide që nuk ishte bërë publike më parë.

“Le të darkojmë së bashku në Paris të enjten përpara se të kthehesh në SHBA,” i shkruan Macron, duke sugjeruar se në tryezë mund të jenë edhe danezët, sirianët dhe vendet e G7.

Fundi i “diplomacisë diskrete”?

Publikimi i këtyre mesazheve konfirmon edhe një herë stilin e paparashikueshëm të Trump, i cili duket se nuk njeh kufij midis komunikimit personal dhe atij shtetëror.

Për liderët evropianë si Macron, të cilët mburren se mund ta telefonojnë Trumpin në çdo kohë, ky është një sinjal i qartë: në epokën e Trump, asgjë nuk mbetet private përgjithmonë.

/rtsh.al/