Ish-ministri i Jashtëm sllovak, Miroslav Lajçak, ka dhënë dorëheqjen nga posti i këshilltarit të kryeministrit Robert Fico, pas publikimit të komunikimeve të tij me Jeffrey Epstein.

Dorëheqja u konfirmua nga agjencia sllovake e lajmeve TASR dhe është raportuar gjerësisht nga mediat vendase.

Sipas TASR, Lajçak deklaroi se vendimi për të dhënë dorëheqjen nuk lidhet me ndonjë veprim kriminal apo joetik nga ana e tij, por për të shmangur që kryeministri Fico të paguajë një çmim politik për diçka që nuk ka lidhje me vendimet e tij. Kryeministri Robert Fico ka pranuar dorëheqjen, duke e cilësuar Lajçakun si një diplomat të shkëlqyer dhe një burim të jashtëzakonshëm përvoje në politikën e jashtme .

Në reagimin e tij, Lajçak tha se dënon krimet e kryera nga Epstein dhe se nëse do ta kishte ditur më herët seriozitetin dhe shkallën e plotë të veprimeve të tij, nuk do të kishte pasur komunikim.

Ai shtoi se bisedat e publikuara ishin “informale dhe të lehta, pa ndonjë përmbajtje të vërtetë”.

“Fjalët dhe veprimet janë dy gjëra të ndryshme. Megjithatë, nga perspektiva e sotme, ne i vlerësojmë veprimet individuale ndryshe, dhe madje edhe një bisedë normalisht e parëndësishme vihet në një kontekst tjetër”, tha Lajçak për mediat sllovake .

Ai mohoi kategorikisht se i janë ofruar ndonjëherë favore seksuale, se ka marrë pjesë apo ka qenë dëshmitar i tyre, duke theksuar se si diplomat profesionist nuk do të kryente veprime që mund të çonin në diskreditimin e tij.

Sipas dokumenteve të publikuara nga Departamenti i Drejtësisë i SHBA-së, emri “Miro” – që përdorej nga Epstein për Lajçakun – shfaqet mbi 700 herë në dosje.

Mediat sllovake si 360tka kanë raportuar se komunikimet përfshijnë mesazhe miqësore rreth “vajzave”, ku Lajçak i shkruante Epsteinit nga Kievi dhe Moska, duke bërë komente për pamjen e tyre. Në një mesazh të tetorit 2018, ai i shkruante: “Përshëndetje nga Kievi! Vajzat këtu janë po aq të bukura sa gjithmonë” .

Në një tjetër bisedë, Epstein i përgjigjej duke i përshkruar vajzat si “eksporti më i mirë rus”, ndërsa Lajçak shprehej se nuk kishte asnjë vajzë pranë tij në atë moment.

Dorëheqja e Lajçakut ka shkaktuar debat në Sllovaki, duke ardhur në një kohë kur qeveria e Ficos është nën presion për transparencë dhe integritet.

Mediat vendase theksojnë se, pavarësisht dorëheqjes, Lajçak mbetet një figurë e njohur në diplomacinë europiane, i cili ka shërbyer si i dërguar i BE-së për dialogun Kosovë-Serbi dhe ka mbajtur poste të larta në politikën e jashtme sllovake.

/rtsh.al/