Reshjet e shiut të rëna gjatë natës kanë krijuar probleme në qytetin e Lezhës, duke shkaktuar përmbytje në disa zona urbane. Sistemi i kanalizimeve nëntokësore nuk ka arritur të përballojë nivelin e lartë të prurjeve, çka ka bërë që uji të dalë në sipërfaqe dhe të përmbytë rrugë e hapësira mes pallateve.

Më problematike paraqiten blloqet e banimit “11 Janari” dhe zona “11.2 hektarë” në lagjen Besëlidhja, ku prania e ujit në rrugë ka vështirësuar ndjeshëm lëvizjen e qytetarëve dhe qarkullimin e automjeteve.

Për shkak të nivelit të lartë të ujit, Policia Bashkiake ka bllokuar qarkullimin në disa akse rrugore, duke orientuar drejtuesit e mjeteve drejt rrugëve alternative, me qëllim garantimin e sigurisë dhe shmangien e incidenteve.

Në ngadalësimin e largimit të ujërave ka ndikuar edhe projekti i nisur prej disa muajsh për rehabilitimin e sistemit të kanalizimeve të ujërave të bardha dhe të zeza, i cili synon zgjidhjen përfundimtare të problematikës së përmbytjeve në qytet.

Ndërkohë, moti i keq ka shkaktuar probleme edhe me furnizimin me energji elektrike, si në qytet ashtu edhe në zonat rurale. Grupet e punës të Operatorit të Shpërndarjes së Energjisë Elektrike ndodhen në terren për riparimin e defekteve dhe rikthimin sa më të shpejtë të energjisë në zonat e prekura.

/rtsh.al/