Drejtori i Përgjithshëm i Doganave, Besmir Beja, zhvilloi një takim me strukturat e Drejtorisë së Antikontrabandës, ku në fokus ta qenë forcimi i luftës kundër paligjshmërisë.

Gjithashtu gjatë takimit bashkëbiseduesit kërkuan rritje të efikasitetit në parandalimin dhe zbulimin e shkeljeve doganore, si dhe shtimi i pranisë në të gjithë territorin e vendit. Drejtori Beja kërkoi më shumë vigjilencë dhe ndërgjegjësim të shtuar për rolin kyç që kjo drejtori ka në garantimin e një tregtie të ndershme dhe të sigurt.

Ai përgëzoi strukturën e Antikontrabandës për rezultatet konkrete të ditëve të fundit, ku brenda vetëm një jave u finalizuan me sukses tre operacione të rëndësishme kundër paligjshmërisë, duke e cilësuar këtë si një tregues të qartë të profesionalizmit dhe vendosmërisë në terren.

Në mesazhin e tij, Drejtori i Përgjithshëm theksoi se Antikontrabanda nuk duhet parë si një “hallkë e dytë” e administratës, por si një strukturë me rol të drejtpërdrejtë dhe vendimtar në kontrollin e territorit. “Pritshmëritë ndaj çdo punonjësi që mban këtë uniformë janë të larta”, u shpreh ai, duke garantuar mbështetjen e plotë institucionale për përmbushjen e misionit.

Në përfundim, Drejtori Beja e cilësoi strukturën e Antikontrabandës si “rojtaren e ligjshmërisë” në Administratën Doganore, duke nënvizuar se lufta kundër kontrabandës mbetet një prioritet i panegociueshëm.

/rtsh.al/