Bandat shqiptare po përdorin TikTok, Facebook dhe Instagram për të shitur cigare me çmime të ulura dhe me ‘dërgesë ekspres’ në shtëpitë britanike, duke shfrytëzuar tregun e zi të duhanit, i cili i kushton Thesarit britanik mbi 3 miliardë paund në humbje taksash çdo vit.

Një hetim i Daily Mail zbuloi shumë faqe në TikTok dhe Facebook në gjuhën shqipe që ofronin cigare të markave të njohura, duke sugjeruar se ato janë kontrabanduar dhe mund të jenë të falsifikuara. Çmimet janë dramatikisht më të ulëta se në tregun britanik – rreth 6 deri 7 paund për kuti, krahasuar me mesataren prej 16 paund në supermarket.

Një llogari në TikTok dhe Facebook, e quajtur përafërsisht “Paketa Cigaresh Shqiptare”, ofronte cigare nga Shqipëria dhe Greqia për dërgesë në shtëpi. Gazetari i fshehtë që kontaktoi llogarinë u ofrua 10 pako me cigare për vetëm 65 paund, që do të thotë 6.50 paund për pako, krahasuar me 17.75 paund në dyqanet britanike.

Ekspertët tregojnë se taksa mbi duhanin në Britani është rreth 33 peni për cigare, plus 16.5% mbi çmimin me pakicë, që do të sillte një tarifë doganore prej 6.60 paund për një pako me 20 cigare. Në vend që të paguajnë këto taksa, kriminelët po përdorin tregun e zi për të fituar shuma të mëdha.

Pasi Daily Mail i raportoi faqet, TikTok i mbylli të dyja për shkelje të rregullave kundër shitjes së mallrave të rregulluara, ndërsa Meta, pronari i Facebook dhe Instagram, tha se po hetonte aktivitetin.

Përveç TikTok dhe Facebook, Daily Mail thekson se faqe të ngjashme që shesin cigare në gjuhën shqipe mund të gjenden edhe në Instagram, duke treguar për një fenomen në rritje të përdorimit të mediave sociale për tregti të paligjshme ndërkombëtare.

Sipas policisë, tregtia dominohet nga grupe ndërkombëtare të krimit të organizuar, me fitimet që përdoren për aktivitete të tjera kriminale, përfshirë trafikun e drogës, armëve dhe kontrabandën e njerëzve. Grupi shqiptar tashmë kontrollon pjesën më të madhe të tregut të kokainës në Mbretërinë e Bashkuar dhe tani po shtrihet edhe në tregun e zi të duhanit.

/rtsh.al/