Policia e Shtetit, në bashkëpunim me Prokurorinë e Tiranës, ka finalizuar operacionin e koduar “Distanca”, duke vënë në pranga autorin e dyshuar të një vrasjeje të ndodhur rreth dhjetë ditë më parë në kryeqytet.

Shtetasi Gazment Buçpapa, 40 vjeç, u lokalizua dhe u ndalua në vendlindjen e tij, në Tropojë, pasi ishte shpallur në kërkim për vrasjen e shtetasit, Egli Pashollari. Ngjarja e rëndë u regjistrua më datë 20 shkurt 2026, gjatë një konflikti të çastit në rrugën “Kongresi i Lushnjës” në Tiranë, ku viktima u qëllua për vdekje me armë të ftohtë (thikë).

Ndjekja dhe lokalizimi

Pas krimit, autori ishte larguar nga Tirana duke tentuar t’i fshihej drejtësisë. Specialistët e Sektorit për Hetimin e Krimeve të Rënda në DVP Tiranë, përmes metodave proaktive dhe punës operacionale, arritën të identifikonin strehën ku fshihej 40-vjeçari. Ai u mbajt në mbikëqyrje të rreptë derisa u ndërhye për ndalimin e tij në një banesë në Tropojë.

Akuzat e ngritura

Ndaj shtetasit G. B. rëndojnë dy vepra penale:

“Vrasja me dashje”

“Prodhimi, mbajtja, blerja apo shitja pa leje e armëve të ftohta”

Materialet procedurale i kanë kaluar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme hetimore. Policia bëri me dije se operacioni ishte rezultat i një koordinimi profesional mes strukturave hetimore dhe forcave operacionale.

/rtsh.al/