Disa vende evropiane po dërgojnë mjete detare për të mbrojtur Qipron, pas sulmit me dron iranian ndaj një baze ushtarake britanike në ishull, i cili ndodhi të dielën.

Ministri i Mbrojtjes i Italisë, Guido Crosetto, njoftoi se Italia do të dërgojë “asete detare” në mbështetje të Qipros, së bashku me Spanjën, Francën dhe Holandën. Crosetto shtoi se vendosja e mjeteve do të realizohet gjatë ditëve në vijim.

Po ashtu, zyra e presidentit francez Emmanuel Macron njoftoi se ai ka kontaktuar me udhëheqësit italianë dhe grekë, të cilët ranë dakord për dërgimin e mjeteve ushtarake në Qipro.

Ndërkohë, në bazën e Akrotirit u aktivizua një alarm sigurie gjatë vizitës së sekretarit të Mbrojtjes të Mbretërisë së Bashkuar, John Healey. Sirenat u dëgjuan në zonë dhe banorët e zonës së Kourion morën mesazhe paralajmëruese në telefonat e tyre, duke u kërkuar të qëndronin brenda, larg dritareve, dhe të mbroheshin pas mobiljeve të forta. Alarmi zgjati rreth dhjetë minuta para se të hiqej.

/rtsh.al/