Të shtëna me armë zjarri janë regjistruar mbrëmjen e kësaj të enjte (5 mars) në Shkodër, ku për pasojë ka mbetur i plagosur një person. Policia njofton se ngjarja është regjistruar rreth orës 21:10, në vendin e quajtur Ura Dervishbeg, në rrugë në afërsi të një ambienti servis.

Dyshohet se personi me inicialet I. G. ka qëlluar me armë zjarri dhe si pasojë, është plagosur 45-vjeçari me inicialet G. H., i cili ka marrë dëmtime në këmbë dhe ndodhet nën kujdesin e mjekëve, jashtë rrezikut për jetën.

Ngjarja erdhi pas një debati për motive të dobëta, ndërsa autori u vu në pranga vetëm disa minuta më pas. Policia sekuestroi edhe armën e zjarrit të përdorur nga autori, pistoletë të cilën e kishte me leje.

Materialet procedurale i kanë kaluar Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.

/rtsh.al/