Ambasada Britanike në Tiranë ka reaguar lidhur me zhvillimet e fundit politike në Shqipëria, duke theksuar rëndësinë e respektimit të sundimit të ligjit dhe pavarësisë së sistemit gjyqësor.

Në një deklaratë zyrtare, ambasada vlerëson progresin e bërë nga Shqipëria në reformën në drejtësi që prej vitit 2016, ndërsa shton se imuniteti parlamentar duhet të shërbejë për mbrojtjen e proceseve demokratike, por nuk duhet të bëhet pengesë për llogaridhënien e barabartë para ligjit.

“Ambasada Britanike thekson rëndësinë e ruajtjes së sundimit të ligjit dhe pavarësisë gjyqësore, dhe njeh progresin e Shqipërisë në reformën gjyqësore që nga viti 2016, përfshirë krijimin e SPAK-ut.

Ekzekutivi, Gjyqësori dhe Legjislativi mbeten partnerë të barabartë në mbështetjen e këtij progresi si pjesë e qëllimit të Shqipërisë për arritjen e anëtarësimit në BE.

Ndërsa imuniteti parlamentar duhet të mbrojë proceset demokratike, ai nuk duhet të jetë pengesë për llogaridhënie të barabartë para ligjit”, thuhet në njoftimin e ambasadës.

Ky reagim vjen në një kohë kur sot Kuvendi pritet të diskutojë kërkesën e SPAK për autorizim për arrestimin e deputetes Belinda Balluku, në kuadër të hetimeve të lidhura me projektet e Tuneli i Llogarasë dhe Unaza e Madhe e Tiranës.

Më herët, Partia Socialiste ka deklaruar se nuk do të japë autorizim për heqjen e imunitetit të deputetes Balluku. Sipas socialistëve, ajo nuk ushtron më funksion shtetëror dhe për rrjedhojë nuk mund të ndikojë në prishjen e provave. PS argumenton gjithashtu se SPAK nuk ka paraqitur prova konkrete që të justifikojnë ashpërsimin e masës së sigurisë.

Nga ana tjetër, Partia Demokratike e Shqipërisë kërkon që Kuvendi t’i hapë rrugë SPAK për vijimin e hetimeve, duke argumentuar se provat e paraqitura nga prokuroria tregojnë për rëndim të pozitës penale të deputetes Balluku.

/rtsh.al/