Një aksident tragjik është regjistruar në Vjenë, ku disa persona kanë humbur jetën në një kantier ndërtimi, përfshirë edhe tre shtetas të Kosovës.

Ambasada e Kosovës në Austri, ka bërë me dije se ngjarja ka ndodhur në distriktin Alsergrund, gjatë zhvillimit të punimeve ndërtimore, kur një pjesë e konstruksionit është shembur, duke zënë nën rrënoja punëtorë të pranishëm në vendin e punës.

Sipas RTK-së, autoritetet austriake kanë konfirmuar se në mesin e viktimave janë Istref Zekajn, Pajtim Bajrami (1990) dhe Asllan Musliu (1977), të tre shtetas të Kosovës.

Ambasada e Kosovës në Austri ka shprehur dhimbjen e thellë për këtë tragjedi dhe u ka përcjellë ngushëllime familjeve të viktimave. Po ashtu, bëhet e ditur se ambasada është në kontakt të vazhdueshëm me autoritetet austriake dhe është e angazhuar për të ofruar mbështetje për familjarët e të ndjerëve.

Autoritetet austriake po vijojnë hetimet për zbardhjen e plotë të rrethanave të aksidentit.

/rtsh.al/