Problemet e shëndetit mendor janë në rritje, kryesisht tek të rinjtë, një fenomen që po shqetëson gjithnjë e më shumë specialistët e fushës.

“Kohët e fundit vërehet një prevalencë në rritje të problemeve të shëndetit mendor, kryesisht gjendjet e akthit, depresioni”, u shpreh Pranvera Alimani, psikiatre.

Sipas psikiatres Pranvera Alimani, shpeshherë shenjat e para kalojnë pa u vërejtur ose keqinterpretohen, duke u konsideruar si pjesë normale e moshës së adoleshencës.

“Zakonisht grupmoshat ku shfaqet për herë të parë janë të rinjtë mirëpo ndonjëherë ndodh një konfuzion, sjellje tipike të moshës ngatërrohen dhe neglizhohen dhe nuk marrin vëmendjen e duhur si shenjat e para të shëndetit mendor”, tha ajo.

Ajo thekson se ndër faktorët kryesorë që ndikojnë në përkeqësimin e shëndetit mendor tek të rinjtë mbeten përdorimi i tepërt i teknologjisë, si dhe ekspozimi ndaj substancave narkotike.

“Teknologjitë kanë një impakt të drejtpërdrejtë në shëndetin mendor”, theksoi Alimani.

Shenjat më të zakonshme shpesh kalojnë pa u vënë re në fazat e hershme.

“ndryshim në mënyrën e të ushqyerit, qëndrimet vonë në orët e natës, rënia në performancë në mësime, izolimi janë shenja të para që nuk duhen neglizhuar”, tha psikiatrja.

Ekspertët apelojnë për më shumë vëmendje ndaj shëndetit mendor, duke theksuar se mbështetja familjare, komunikimi i hapur dhe qasja në shërbime profesionale janë kyçe për mirëqenien e të rinjve.

/rtsh.al/