Një 28-vjeçar, i dënuar më parë për vrasje, është vënë në pranga në Durrës këtë të hënë (30 mars), pasi lëvizte nëpër qytet me armë me vete. I riu me inicialet E.V., u ndalua nga Forca e Posaçme Shqiponja në lagjen nr.13 në Durrës, teka po lëvizte me një automjet që drejtohej nga personi me inicialet A.L.. Ky i fundit u procedua penalisht për moskallëzim të krimit.

Gjatë kontrollit fizik, 28-vjeçarit iu gjet 1 armë zjarri pistoletë, me municion luftarak, që ai e posedonte pa leje.

Në përfundim të veprimeve procedurale, ai u arrestua në flagrancë për veprën penale “Mbajtja pa leje dhe prodhimi i armëve, armëve shpërthyese dhe i municionit”.

Materialet procedurale iu kaluan Prokurorisë së Durrësit, për veprime të mëtejshme.

Njoftimi i plotë i policisë

Durrës/Finalizohet operacioni policor i koduar “Pasagjeri”.

Lëvizte i armatosur me armë zjarri pistoletë, vihet në pranga 28-vjeçari, i dënuar më parë për vrasje dhe armëmbajtje pa leje.

Procedohet penalisht drejtuesi i automjetit, për moskallëzim të krimit.

Sekuestrohet arma e zjarrit pistoletë.

Shërbimet e Forcës së Posaçme “Shqiponja”, në vijim të punës për identifikimin dhe ndalimin e shtetasve që qarkullojnë me armë pa leje, bazuar edhe në informacionet e siguruara në rrugë operative, për një rast të kësaj veprimtarie kriminale, organizuan dhe finalizuan operacionin e koduar “Pasagjeri”.

Gjatë operacionit, në lagjen nr. 13, Durrës, u ndalua automjeti me drejtues shtetasin A. L., ku dyshohej se lëvizte si pasagjer një shtetas i armatosur, shtetasi E. V.

Gjatë kontrollit fizik, shtetasit E. V., pasagjer në këtë automjet, iu gjet 1 armë zjarri pistoletë, me municion luftarak, që ai e posedonte pa leje.

Në përfundim të veprimeve procedurale, shtetasi E. V., 28 vjeç, banues në Shijak, u arrestua në flagrancë për veprën penale “Mbajtja pa leje dhe prodhimi i armëve, armëve shpërthyese dhe i municionit”.

Ndërsa shtetasi A. L., 25 vjeç, banues në Shijak, u procedua në gjendje të lirë, për veprën penale “Moskallëzimi i krimit”.

Materialet procedurale iu kaluan Prokurorisë së Durrësit, për veprime të mëtejshme.

/rtsh.al/