Zjarri nuk kërcënon vetëm zonat ku digjet. Tymi dhe grimcat e tij e imëta mund të lëvizin me erën dhe të ndikojnë në cilësinë e ajrit që thithim edhe në zona të largëta duke rënduar veçanërisht gjëndjen e personave më sëmundje të mushkërive dhe zemrës.

Pneumologu Arben Tanka në spitalin universitar “Shefqet Ndroqi” shpjegon efektet e toksinave që çlirohen dhe instalohen në mushkëri

“Efeket e zjarrit kaq afër  mund të jenë ndjerë edhe në kryeqytet. Sigurisht që ajo ka efekt irritativ që kryesisht vjen nga grimcat e vogla PM2,5 të cilat mund të futen në  alveola, por zjarri çliron edhe  hidrokarburet aromatike dhe substanca të tjera irrituese të cilat shkaktojnë stres oksidativ dhe inflamacion në rrugët e frymëmarrjes“, tha Tanka.

Mjekët tregojnë si shfaqen simptomat e ekspozimit në ajër të ndotur nga zjarret dhe ata që rrezikohen më shumë.

 “Simtomat më të zakonshme janë kolla, irritimi ose djegia e hundës dhe fytit, shtimi i sekrecioneve dhe vështirësia në frymëmarje. Rreziku më i lartë është tek fëmijët, të moshuarit , personat me astmë, SPOK, dhe sëmundje të tjera kronike pulmonare. Ekspozimi është veçanërisht i lartë te zjarrfikësit dhe persobnat që qëndrojnë pranë vatrave të zjarrit sidomos kur ekspozimi zgjat për një kohë të gjatë“, tha ai.

Mjekët këshillojnë disa veprime praktike për mbrojtjen e popullatës.

“Rekomandohet mbajtja e dritareve mbyllur dhe përdorimi i maskave të thjeshta për të mos lejuar grimcat të përthithen direkt“, nënvizoi mjeku.

Aktualisht Spitali Universitar “Shefqet Ndroqi“ nuk ka patur urgjenca të personave të ekspozuar ndaj tymit.

/rtsh.al/