Tre nga specialitetet më të rëndësishme në Spitalin “Isa Zllami” të Tropojës janë kompletuar me staf mjekësor. Bëhet fjalë për tre mjekë, obstetër-gjinekolog, pneumolog dhe kardiolog, që i janë shtuar së fundmi stafit të këtij spitali dhe, sipas drejtorit Kujtim Rexha, është zgjidhur njëri prej problemeve shqetësuese për komunitetin e Tropojës, të cilët këto shërbime i merrnin në Kukës, Gjakovë apo edhe në Tiranë.

“Muajt e fundit spitalit tonë iu bashkuan edhe tre mjekë të rinj specializantë, një pneumolog, një kardiolog dhe një mjeke gjinekologe-obstetre”, deklaroi Drejtori i Spitalit Tropojë, Kujtim Rexha.

Sipas drejtorit të spitalit, ende ka nevojë për plotësimin e nevojave me mjekë të specialiteteve të tjera, duke besuar se edhe këto mungesa do të vihen në rrugën e zgjidhjes.

“Presim që të kompletohemi edhe me mjekë të tjerë. Kemi nevojë për kirurg, për anestezistë”, tha ai.

Vetë pozita gjeografike e Tropojës e kthen këtë spital në një institucion të rëndësishëm shëndetësor për të ofruar shërbimet e urgjencave edhe për një sërë fshatrash të Pukës.

“Fshatrat e Pukës, domethënë që vijojnë në Qafë të Malit dhe këtej, që kanë afërsi më të madhe me spitalin tonë, dhe ne gjithmonë u vijmë në ndihmë për raste urgjente me ambulancat tona”, deklaroi mjeku.

Krahas plotësimit me staf të kualifikuar mjekësor, në Spitalin e Tropojës janë realizuar edhe një sërë investimesh të ofruara nga biznesmenë vendas dhe shoqata të huaja. Kujtojmë se pak muaj më parë u bë e mundur një paketë ndihme me pajisje mjekësore, hoteliere dhe ato të kuzhinës, që u ofruan nga shoqata “Iliria” dhe Fondacioni “Mus Tahir Kalbaj”. Ndërsa në projektbuxhetin e këtij viti është miratuar një fond prej 2.2 milionë eurosh për rikonstruksionin e plotë të këtij spitali.

/RTSH/