Ministrja e Shëndetësisë, Klodiana Spahiu, sëbashku me drejtuesin politik të PS për Qarkun e Tiranës, Taulant Balla, zhvilluan një takim me ekipin e mjekëve në Kavajë, ku diskutuan riorganizimin e shërbimeve shëndetësore dhe forcimin e kapaciteteve.

Ministrja Spahiu kwrkoi  shtrirjen e depistimit për kancerin e gjirit përgjatë gjithë vitit.

“Ne e quajmë tetori rozë, por mos konsideroni vetëm muajin tetor si muaji që ne kujdesemi për kancerin e gjirit, por çdo muaj duhet që një numër të caktuar të targetgrupit t’i çojmë për të kryer mamografi”, tha ajo.

Balla bëri të ditur se për herë të parë në Shqipëri do të nisë një program i plotë depistimi për gratë e moshës 25 deri në 55 vjeç. Sipas Ballës, nisma do të realizohet në bashkëpunim me Shoqatën Europiane të Kolposkopisë dhe do të përfshijë të gjithë procesin, nga diagnostikimi deri te trajtimi.

“Kontrolli i hershëm shpëton jetë. Falë punës së Drejtorit të Spitalit Kavajë, Arben Rrugia, për herë të parë në Shqipëri, në Kavajë, në bashkëpunim me Shoqatën Europiane të Kolposkopisë, do të kryhet depistimi i plotë i të gjitha grave nga mosha 25 deri në 55 vjeç, duke filluar me diagnostifikimin deri tek trajtimi i plotë”, u shpreh Balla.

/rtsh.al/