Gjykata Kushtetuese ka pranuar pjesërisht ankimin e Sali Berishës për masën e sigurisë “detyrim paraqitjeje”, duke shfuqizuar vendimin e Kolegjit Penal të Gjykatës së Lartë dhe duke e kthyer çështjen për rishqyrtim në këtë gjykatë.

Në vendimmarrjen e datës 9 tetor 2026, Kushtetuesja vlerësoi se masa e sigurimit “detyrim për t’u paraqitur në Policinë Gjyqësore” ndërhyn në lirinë e lëvizjes, të garantuar nga neni 38 i Kushtetutës.

Sipas Gjykatës, Gjykata e Lartë nuk u ka dhënë përgjigje pretendimeve të Berishës lidhur me nevojën dhe përshtatshmërinë e kësaj mase sigurimi.

Për këtë arsye, me shumicë votash, Gjykata Kushtetuese vendosi të shfuqizojë vendimin e Kolegjit Penal të Gjykatës së Lartë, të datës 22 prill 2025, dhe ta dërgojë çështjen për shqyrtim në të njëjtën gjykatë.

Ndërkohë, për pretendimet e tjera të Berishës për cenimin e së drejtës për proces të rregullt ligjor, Kushtetuesja vlerësoi se ato kishin marrë përgjigje nga gjykatat e juridiksionit të zakonshëm. Sipas saj, arsyetimi i këtyre gjykatave nuk rezultoi arbitrar dhe as i pamjaftueshëm nga pikëpamja kushtetuese.

Gjithashtu, Gjykata vendosi që shpenzimet e përfaqësimit të Berishës, në vlerën 60 mijë lekë, t’i ngarkohen Ministrisë së Financave.

Çfarë ndodh me detyrimin e paraqitjes?

endimi i Kushtetueses nuk e heq automatikisht masën e sigurimit ndaj Berishës. Çështja i kthehet Gjykatës së Lartë, e cila duhet të shqyrtojë pretendimet lidhur me nevojën dhe përshtatshmërinë e masës, duke marrë parasysh arsyetimin kushtetues.

Vendimi i plotë dhe i arsyetuar i Gjykatës Kushtetuese do të shpallet brenda afateve ligjore.

/rtsh.al/