Një 29-vjeçar është arrestuar në Kamzë, pasi u kap në automjetin e tij me një armë zjarri pistoletë, me qëllim trafikimin e saj. Në kuadër të hetimeve, ndaj tij ka nisur edhe hetimi pasuror.

Në pranga u vu shtetasi E. C., 29 vjeç, banues në Krujë, i dënuar më parë për veprën penale “Trafikimi i mjeteve motorike”.

Gjatë kontrollit të automjetit që drejtonte, shërbimet e Policisë gjetën një armë zjarri pistoletë, e cila u sekuestrua së bashku me automjetin dhe një celular.

Ndërkohë, gjatë kontrollit të banesës së tij, u gjetën dhe u sekuestruan një armë gjahu pa leje dhe 50 fishekë. Gjithashtu, Policia sekuestroi një bllok shënimesh, ku dyshohet se mbaheshin të dhëna për shuma të ndryshme parash.

Për shkak të dyshimeve mbi aktivitetin e tij financiar, ka nisur edhe hetimi pasuror ndaj 29-vjeçarit.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprat penale “Trafikimi i armëve dhe municionit” dhe “Fshehja e të ardhurave”.

/rtsh.al/