Kryeministri Edi Rama ka reaguar nga godina e dëmtuar nga zjarri e Kolegjit të Europës në Tiranë, pas akteve të dhunës gjatë protestës. Përmes një mesazhi nga ambientet e godinës, Rama dënoi dëmtimin e institucionit, duke theksuar se studentët përfaqësojnë të ardhmen dhe se dhuna nuk mund të përfaqësojë aspiratat e tyre.

“Deri dje kjo ishte zyra e Kolegjit të Europës, shkollës së Europës së bashkuar, që e çelën në Shqipëri së bashku udhëheqësit europianë. Sot kjo është rrënoja e duarve që nuk janë dhe s’mund të jenë kurrë duart e studentëve”, u shpreh Rama.

Kreu i qeverisë theksoi se studentët janë gjithmonë të mirëpritur dhe se qeveria mbetet e gatshme për dialog, diskutim dhe gjetjen e zgjidhjeve për çështjet që kërkojnë vëmendje.

“Studentët janë e ardhmja, që shohin larg dhe duan të shkojnë më larg dhe më shpejt. Studentët janë gjithnjë të mirëpritur dhe për ta jemi gjithnjë gati të ulemi, të flasim, të diskutojmë dhe të gjejmë zgjidhje për gjërat që kërkojnë zgjidhje”, deklaroi Rama.

Më tej, kreu i qeverisë akuzoi opozitën se, sipas tij, po përpiqet të pengojë rrugëtimin europian të Shqipërisë përmes akteve të dhunës. Ai shtoi se, sipas tij, opozita synon ta kthejë vendin në një gjendje të mëparshme, nga e cila Shqipëria është larguar gjatë viteve të fundit.

“Janë duart e atyre që përpiqen të ulin poshtë Shqipërinë, janë duart e një opozite e cila me maska të verbërish përpara, me zjarre e hekur, kërkon ta rikthejë Shqipërinë aty ku Shqipëria nuk do të rikthehet kurrë. Kërkon ta rikthejë Shqipërinë në humnerën nga ku ne të gjithë së bashku e nxorëm dhe prej ku po e ngjisim drejt majës historike, drejt ëndrrës së të gjithë shqiptarëve në breza, BE-së”, u shpreh Rama.

Gjatë fjalës së tij, kreu i qeverisë paralajmëroi se personat e përfshirë në aktet e dhunës do të përballen me përgjegjësi ligjore. Rama e cilësoi dhunën e regjistruar në qendër të Tiranës si një përpjekje për ta kthyer vendin në të kaluarën, duke deklaruar se shqiptarët nuk do të jenë më pengje të saj.

“Përgjegjësia para ligjit është e gjithsecilit dhe gjithkush që ka dorë në këtë katrahurë sigurisht që do të paguajë. Do të paguajë, sepse Shqipëria nuk do të kthehet më kurrë pas. E ardhmja është e studentëve, e ardhmja është e Shqipërisë”, tha Rama.

Rama u shpreh se, pavarësisht situatës së krijuar, Shqipëria do të vijojë rrugën drejt Bashkimit Europian. Ai e cilësoi godinën e dëmtuar të Kolegjit të Europës si simbol të kontrastit mes së ardhmes europiane që synon vendi dhe akteve të dhunës të regjistruara gjatë protestës.

“Janë orë të vështira, por janë orë të cilat do t’i kalojmë të gjithë së bashku, sepse Shqipëria do të vazhdojë të ngjitet, sepse Shqipëria do të vazhdojë në rrugën e saj për Europën e të gjithë studentëve të saj, e të gjithë vajzave dhe djemve të saj”, deklaroi Rama.

/rtsh.al/