Ministrja e Ekonomisë dhe Inovacionit, Delina Ibrahimaj, ka reaguar pas dëmtimeve të shkaktuara ndaj filialeve bankare gjatë akteve të dhunës të ditëve të fundit, duke garantuar qytetarët për sigurinë e depozitave të tyre.

Ibrahimaj bëri të ditur se mbi 15 filiale bankash janë dëmtuar, duke prekur ambientet ku qytetarët marrin pagat, kryejnë transaksione dhe përmbushin detyrimet e tyre të përditshme.

Ministrja theksoi se, pavarësisht dëmeve të shkaktuara, sistemi bankar shqiptar mbetet i qëndrueshëm dhe i mbikëqyrur, ndërsa depozitat e qytetarëve janë të sigurta.

“Dua t’i siguroj të gjithë qytetarët se depozitat e tyre janë të sigurta. Sistemi ynë bankar është i shëndoshë, i mirëkapitalizuar dhe i mbikëqyrur”, u shpreh Ibrahimaj.

Ajo gjithashtu theksoi se përpjekjet për të krijuar panik dhe për të cenuar besimin te ekonomia shqiptare nuk do të ndikojnë në garantimin e stabilitetit financiar të vendit.

Ibrahimaj dënoi aktet e dhunës, duke nënvizuar se qytetarët shqiptarë nuk e mbështesin dhunën dhe kaosin.

“Shqiptarët nuk e duan dhunën. Shqiptarët nuk e duan rrëmujën. Shqipëria është e shqiptarëve!”, përfundoi Ibrahimaj.

/rtsh.al/