Të paktën 1,200 persona janë arrestuar dhe 150 efektivë policie janë plagosur gjatë protestave të dhunshme që përfshinë Francën të shtunën. Sipas autoriteteve franceze, rreth 550 mijë persona dolën në rrugë në demonstratat kundër vështirësive në arsim dhe rritjes së kostos së jetesës, ndërsa në disa qytete pati përplasje me policinë, zjarrvënie, grabitje dhe dëmtime të pronës publike e private.

Në Paris, përplasjet me policinë vijuan deri në orët e mbrëmjes. Forcat e rendit përdorën gaz lotsjellës dhe ujë për të shpërndarë turmat, ndërsa disa grupe protestuesish dogjën automjete dhe ndezën zjarre në rrugë, përfshirë edhe në zonën e sheshit të Republikës.

Gjatë protestave u raportuan gjithashtu grabitje të dyqaneve, dëmtime të bizneseve dhe djegia e të paktën një restoranti.

Dhuna u përhap edhe në qytete të tjera të Francës. Në Limoges, një zjarr i madh përfshiu ndërtesën e bashkisë, duke shkaktuar shembjen e pjesshme të çatisë. Ekipet e zjarrfikësve ndërhynë për të vënë situatën nën kontroll.

Në Lion, zjarri përfshiu zyrën turistike të qytetit. Kryebashkiaku Grégory Doucet e cilësoi ngjarjen si një tragjedi, duke theksuar rëndësinë historike të ndërtesës.

Ndërkohë, në Saint-Étienne, një i ri mbeti rëndë i plagosur. Dëme dhe akte vandalizmi u raportuan gjithashtu në Grenoble, Avignon, Pau, Montpellier dhe Valence.

Demonstratat janë nxitur nga pakënaqësitë për mungesën e stafit dhe gjendjen e amortizuar të shkollave të mesme, ku studiojnë të rinj të moshës 15 deri në 18 vjeç. Lëvizjes së studentëve dhe nxënësve u janë bashkuar sindikata dhe grupe të tjera protestuese, përfshirë mbështetës të lëvizjes së jelekëve të verdhë, e cila organizoi protesta kundër rritjes së kostos së jetesës që prej vitit 2018.

Ministria e Brendshme franceze bëri të ditur se në disa zona, përfshirë Parisin, Marsejën, Rennes, Toulouse dhe Angers, u regjistruan akte të dhunshme nga persona të maskuar.

Kryeministri Sébastien Lecornu deklaroi se policia u përball me dhunë të një intensiteti të jashtëzakonshëm.

Protestat zhvillohen në një periudhë pasigurie politike në Francë, përpara zgjedhjeve presidenciale të planifikuara për prillin e ardhshëm.

Jean-Luc Mélenchon, drejtues i partisë së majtë La France Insoumise, mori pjesë në demonstrata dhe akuzoi policinë se kishte ushtruar forcë ndaj protestuesve. Megjithatë, ai dënoi edhe grabitjet dhe zjarrvëniet.

/rtsh.al/