Presidenti francez Emmanuel Macron ka refuzuar dorëheqjen e ministrit të Brendshëm, Laurent Nunez, i cili mori përgjegjësinë për mangësitë e sigurisë gjatë protestave të dhunshme që tronditën Francën gjatë fundjavës.

Megjithëse pranoi se pati dështime në menaxhimin e situatës, kreu i shtetit kërkoi vazhdimësi në drejtimin e forcave të rendit për përballimin e krizës.

Në një intervistë për radion France Inter, Nunez deklaroi se kishte paraqitur dorëheqjen e tij pasi e konsideronte veten përgjegjës për atë që ndodhi gjatë trazirave.

“Ofrova dorëheqjen sepse jam plotësisht përgjegjës për atë që ndodhi”, tha ai, duke pranuar një “dështim për të parashikuar” dhe për t’u përgatitur për sfidat me të cilat u përballën forcat e sigurisë.

Sipas Pallatit Élysée, ministri i Brendshëm ia paraqiti dorëheqjen presidentit të dielën, por Macron vendosi ta refuzojë atë.

“Duke pasur parasysh nevojën për udhëheqje të vazhdueshme të zbatimit të ligjit në këtë kohë, presidenti refuzoi”, thuhet në deklaratën e presidencës franceze.

Në reagimin e tij, Macron kritikoi “dështimet” që, sipas tij, kontribuan në shpërthimin e dhunës dhe kërkoi transparencë të plotë për mënyrën se si u menaxhuan protestat.

Presidenti i kërkoi ministrit të Brendshëm të sqarojë mangësitë në planifikim dhe në shkëmbimin e informacionit që çuan në përshkallëzimin e situatës, si dhe të ndërmarrë masa për përmirësimin e metodave operative të forcave të sigurisë.

Trazirat e ditëve të fundit kanë lënë pasoja të rënda në disa qytete franceze. Sipas autoriteteve, të paktën 2.400 persona janë arrestuar pas incidenteve që sollën djegien e ndërtesave publike, përfshirë bashki, si dhe dëmtimin dhe plaçkitjen e qindra bizneseve.

Ndërkohë, ministri i Drejtësisë, Gérald Darmanin, deklaroi se ngjarjet nxorën në pah mangësi serioze në mënyrën se si shërbimet e sigurisë përballen me grupet e ekstremit të majtë.

“Është e qartë se nuk po e trajtojmë në mënyrë efektive ultra-të majtën”, tha ai për televizionin France 2, duke shtuar se autoritetet janë më të përgatitura për të përballuar kërcënimet terroriste dhe krimin e organizuar sesa mobilizimet e grupeve radikale në protesta.

Në Marsejë, një nga qytetet më të prekura nga trazirat, policia raportoi se në kulmin e incidenteve në rrugë ndodheshin mbi 30 mijë plaçkitës dhe protestues. Autoritetet angazhuan më shumë se 800 efektivë dhe përdorën mijëra granata gazi lotsjellës për të rivendosur kontrollin.

Nunez bëri të ditur gjithashtu se gjatë natës së fundit janë arrestuar edhe 350 persona të tjerë në gjithë territorin francez, ndërsa fajësoi grupet “ultra të majta” për organizimin dhe nxitjen e dhunës që shoqëroi protestat.

Ai pranoi se policia nuk arriti të parashikonte shkallën e përshkallëzimit të ngjarjeve, duke e cilësuar këtë si një nga arsyet kryesore që çoi në humbjen e kontrollit të situatës në disa qytete të vendit.

/rtsh.al/