Diplomacia rajonale ka shënuar një zhvillim të rëndësishëm gjatë vizitës zyrtare të Ministrit të Jashtëm rus, Sergei Lavrov, në Teheran, ku u takua me homologun e tij iranian, Abbas Araghchi. Fokus kryesor i bisedimeve dypalëshe ishte deeskalimi i situatës ushtarake dhe diplomatike në rajon, si dhe dinamikat e sigurisë në rrugët detare me rëndësi strategjike.

Kreu i diplomacisë iraniane, Abbas Araghchi, e cilësoi takimin si “një takim të rëndësishëm dhe shumë produktiv”, duke u përqendruar në faktorët që po ndikojnë destabilizimin e rajonit. Gjatë konferencës së përbashkët për shtyp, Araghchi drejtoi kritika të drejtpërdrejta ndaj politikës së jashtme të Uashingtonit dhe Aleatëve të tij, duke deklaruar se “lufta e imponuar nga Shtetet e Bashkuara dhe regjimi sionist, së bashku me bllokadën ekonomike, përbën burimin kryesor të pasigurisë në rajonin tonë.”

Lidhur me situatën detare në Gjirin Persik dhe Ngushticën e Hormuzit, Araghchi nënvizoi se “paqëndrueshmëria në atë zonë është një rezultat i drejtpërdrejtë i agresionit ushtarak amerikan dhe sionist”, duke konfirmuar se Teherani dhe Moska do të vazhdojnë bashkëpunimin strategjik përballë veprimeve të njëanshme në arenën ndërkombëtare.

Qëndrimi i Moskos dhe oferta e ndërmjetësimit

Nga ana e tij, Ministri i Jashtëm rus, Sergei Lavrov, shprehu gatishmërinë e Federatës Ruse për të marrë një rol lehtësues në zbutjen e kontradiktave midis Teheranit dhe Uashingtonit. Lavrov bëri me dije se gjatë bisedimeve u analizua “situata që u krijua si rezultat i agresionit të paprovokuar të Shteteve të Bashkuara dhe Izraelit kundër Iranit”, duke përsëritur vullnetin e Moskës për “të ndihmuar në gjetjen e zgjidhjeve të pranueshme reciprokisht për të zgjidhur këtë krizë.”

Përveç kësaj, diplomacia ruse vlerësoi qasjen e Teheranit ndaj kanaleve diplomatike. Lavrov theksoi se Moska mirëpret “angazhimin e Teheranit për të përdorur burimet diplomatike për të vendosur paqe dhe stabilitet afatgjatë në rajon.”

Kreu i diplomacisë ruse dënoi masat shtrënguese financiare e politike, duke deklaruar se “ashtu si shumë vende të tjera, ne e konsiderojmë praktikën e përdorimit të masave shtrënguese të njëanshme, të motivuara politikisht, të cilat bien ndesh me parimet dhe normat e së drejtës ndërkombëtare, si të papranueshme dhe shkatërruese.”

Takimi ritheksoi linjën e bashkëpunimit midis Iranit dhe Rusisë mbi sfidat e përbashkëta në skenën ndërkombëtare, duke lënë të hapur mundësinë e negociatave politike për uljen e tensioneve në Lindjen e Mesme.

/rtsh.al/