Agjencia për Media dhe Informim (MIA) ka dalë me një sqarim zyrtar lidhur me disa materiale filmike që po qarkullojnë së fundmi në rrjetet sociale, ku shfaqen mjete ushtarake duke lëvizur në rrugët e një qyteti. Përmes një deklarate publike, MIA konfirmoi se pamjet në fjalë nuk kanë lidhje me territorin apo forcat ushtarake të Shqipërisë, duke u bërë apel qytetarëve për vigjilencë ndaj përmbajtjeve të paverifikuara.

Në njoftimin e shpërndarë në platformat digjitale, agjencia nënvizon rëndësinë e filtrimit të informacionit përpara se ai të konsiderohet i saktë apo të shpërndahet më tej:

“Ju lutemi, tregoni kujdes me informacionet dhe videot që hasni online. Mos i besoni dhe mos i shpërndani pa verifikuar më parë vërtetësinë e tyre.”

Gjithashtu, MIA vë theksin te roli individual i secilit përdorues të internetit në parandalimin e valëve të dezinformimit publik, duke rikujtuar se “përgjegjësia për të ndalur përhapjen e informacionit të rremë nis nga secili prej nesh.”

/rtsh.al/