Deputetja e Partisë Socialiste Alma Selami, ka deklaruar në emisionin “3D” të Alban Dudushit në RTSH1 se protestat e fundit kanë nisur për një kauzë të drejtë dhe se protestuesit u dëgjuan nga qeveria kur ato ishin paqësore.

Ajo theksoi nevojën për të ndarë qartë protestën e ligjshme dhe demokratike nga ajo e dhunshme, duke shprehur shqetësim të veçantë si nënë dhe ish-mësuese.

Deputetja Selami tha se e ka parë situatën e ditëve të fundit “me shumë shqetësim”, jo vetëm si politikanë me mandatin e parë në Kuvend, por sidomos si nënë.

“Protesta ngjall pasiguri tek të gjithë. Atëherë cila është detyra e atyre që janë më të rritur, më të maturuar edhe për më tepër atyre që kanë detyrimet ligjore profesionale që të ndikojnë në këtë paqtim të situatës”, u shpreh ajo.

Sipas saj, protestat janë instrumenti më i lartë demokratik dhe një e drejtë që duhet ushtruar.

“Këtë kam shpjeguar vajzës time më të vogël. Është një e drejtë që demokracitë e shfrytëzojnë dhe publiku e shfrytëzon në demokraci, por duhet të ndahet mirë protesta, të bëhet e qartë ndarja mes një proteste paqësore… dhe asaj që është e dhunshme që prish atë që së pari është qetësia e të gjithëve ne”, u shpreh ajo.

Deputetja vlerësoi se në fillimet e tyre protestat ishin paqësore dhe u përqafuan nga qytetarët.

“Pa diskutim që në krye të herës protestat kur nisën edhe nisën për një kauzë shumë të drejtë që të gjithë qytetarët e përqafuan atë dhe qenë shumë paqësore, dëgjuan dhe patën vëmendjen e qeverisë”, ka deklaruar deputetja.

Ajo u shpreh se autoritetet përgjegjëse duhet të dëgjojnë me përulësi kërkesat e qytetarëve, duke e krahasuar me rolin e prindit që duhet t’i kushtojë vëmendje fëmijës.

Lidhur me situatën në Peshkopi, ku ajo jeton, Selami tha se qyteti ka qenë përgjithësisht i qetë, me disa episode të izoluara. Ajo shprehu keqardhje të thellë për përfshirjen e të miturve dhe fëmijëve në protesta.

“Si mësuese me 20 vite eksperiencë… ndjej keqardhje të madhe për përdorimin e të miturve dhe fëmijëve në ato protesta”, deklaroi Selami.

/rtsh.al/