Rusia ka shprehur gatishmërinë për të rifilluar negociatat trilaterale për t’i dhënë fund luftës kundër Ukrainës në mes të nëntorit. Këtë ia tha lideri rus Vladimir Putin të dërguarit të posaçëm amerikan Steve Witkoff gjatë takimit në Shën Petersburg.

Kështu raporton agjencia shtetërore ruse e lajmeve RIA Novosti.

Ndihmësi i liderit rus, Yuri Ushakov, zbuloi detajet e takimit, duke thënë se Moska kishte propozuar rifillimin e negociatave që përfshijnë Rusinë, Ukrainën dhe Shtetet e Bashkuara rreth datës 10 nëntor.

Sipas Ushakov, Witkoff mirëpriti gatishmërinë e deklaruar të Rusisë për t’u kthyer në formatin trilateral dhe sugjeroi se presidenti amerikan Donald Trump do t’i përgjigjej pozitivisht propozimit.

Njoftimi vjen në mes të tensioneve pas dështimit të armëpushimit për të mos goditur sektorin energjetik  të shpallur nga Trump, gjë për të cilën, presidenti ukrainas Volodymyr Zelensky akuzoi Rusinë se e kishte shkelur.

Zelenskyy tha se Moska nuk e kishte respektuar armëpushimin energjetik dhe paralajmëroi se Ukraina do të hakmerrej nëse forcat ruse vazhdonin të synonin infrastrukturën energjetike ukrainase gjatë dimrit.

Duke folur në Varshavë, Zelensky theksoi se asnjë rafineri ruse nafte nuk ishte djegur natën e kaluar, por theksoi se Ukraina do të rifillonte goditjet hakmarrëse nëse Moska vazhdonte të shkelte marrëveshjen.

Pavarësisht mosmarrëveshjes për armëpushimin, Witkoff e përshkroi Putinin edhe si “humanitar”, sipas broadcasterit shtetëror rus të kontrolluar Russia Today.

“Ju flisni shumë për presidentin tim, presidentin Trump, se është humanitar. Edhe ju jeni humanitar, zotëri, dhe unë ju jap merita për këtë. Ju ofroj respektin tim dhe ju falënderoj përsëri,” i tha Witkoff Putinit.

Këto vërejtje erdhën pavarësisht një urdhër-arresti të lëshuar nga Gjykata Penale Ndërkombëtare më 17 mars 2023, për përgjegjësinë e pretenduari të Putinit për dëbimin dhe transferimin e paligjshëm të fëmijëve ukrainas nga territoret e pushtuara nga Rusia në Rusi.

Propozimi i Moskës për të rifilluar negociatat vjen pas deklaratave të mëparshme të zyrtarëve rusë që përjashtojnë lëshime politike në bisedimet e mundshme me Uashingtonin.

Më 20 tetor, para vizitës së Witkoff, ministri i Jashtëm rus Sergey Lavrov tha se Rusia ishte e gatshme të shqyrtonte propozimet e sjella nga i dërguari amerikan, por nuk do të pranonte kompromise politike.

Lavrov tregoi gjithashtu se Moska mbeti e interesuar për rindërtimin e marrëdhënieve me vendet perëndimore, ndërsa theksoi se ato marrëdhënie nuk do të ktheheshin në gjendjen e tyre para vitit 2022, para se Rusia të niste pushtimin e saj të plotë të Ukrainës.

/rtsh.al/