Liderët evropianë do të përpiqen të bien dakord mbi mënyrën e financimit të nevojave të pambuluara të Ukrainës prej 70 miliardë eurosh për vitin 2027, në një samit të veçantë që do të mbahet më 26 dhe 27 nëntor, ku do të diskutohet edhe buxheti i ardhshëm afatgjatë i BE-së, tha një zyrtar i Unionit i përfshirë në përgatitjet.

Ukraina, e cila po lufton kundër pushtimit rus që nga viti 2022, ka nevojë për qartësi se si do të mbulohet boshllëku i financimit për vitin e ardhshëm.

Në të njëjtën kohë, qeveritë e BE-së duhet të bien dakord këtë vit për buxhetin e bllokut për periudhën 2028-2034, para se fushatat zgjedhore të vitit të ardhshëm në Francë, Itali, Poloni, Greqi, Estoni, Finlandë dhe Sllovaki ta politizojnë këtë çështje.

Financimi i Ukrainës për vitin 2026 është tashmë i mbuluar. Rreth 31 miliardë euro nga BE-ja ende presin të shpërndahen këtë vit, sapo Kievi të votojë reformet e dakorduara. Këto para vijnë nga një total prej 45 miliardë eurosh që BE-ja ka për Ukrainën këtë vit, nga të cilat 14 miliardë euro janë shpërndarë tashmë.

Ka edhe 45 miliardë euro të tjera (rreth 50 miliardë dollarë) nga BE-ja për Ukrainën për vitin 2027, por nevojat e Ukrainës do të jenë shumë më të larta sepse lufta me Rusinë po vazhdon. BE-ja me 27 anëtarë kishte llogaritur që vende jo-anëtare si Norvegjia, Zvicra, Kanadaja, Japonia dhe Britania e Madhe të kontribuonin me gjithsej edhe 45 miliardë euro të tjera, të shpërndara në vitet 2026 dhe 2027.

Por zyrtarët e BE-së thonë se jo të gjitha këto para janë materializuar dhe, me boshllëkun e financimit të Ukrainës për vitin 2027 që tani vlerësohet rreth 70 miliardë euro – pavarësisht kontributit të planifikuar të BE-së – vendet e BE-së do të duhet të bien dakord për një formë të re financimi, ndoshta një kredi tjetër.

/rtsh.al/