Danimarka do të ofrojë një garanci shtetërore për një kredi prej 750 milionë korona daneze (rreth 112.6 milionë dollarë) për degën daneze të prodhuesit ukrainas të dronëve dhe raketave, Fire Point, njoftoi agjencia e lajmeve Reuters, duke cituar burime nga qeveria daneze.

Sipas qeverisë, garancia shtetërore është parë e nevojshme pasi lufta në Ukrainë e ka pamundësuar kompaninë Fire Point të sigurojë një kredi me kushte standarde tregtare në Danimarkë. Financimi do të kanalizohet nëpërmjet Fundit të Eksportit dhe Investimeve të Danimarkës (EIFO).

Vitin e kaluar, Danimarka njoftoi se kompania ukrainase e mbrojtjes do të nisë prodhimin e karburantit për raketa me rreze të gjatë veprimi në territorin danez.

Ministri danez i Mbrojtjes, Jeppe Bruus, deklaroi se ngritja e kapaciteteve prodhuese jashtë vendit ndihmon Ukrainën të mbrojë zinxhirin e saj të furnizimit nga sulmet ruse. Impianti danez i karburantit të raketave pritet të nisë punën brenda fundit të vitit 2027.

Gjithashtu, Fire Point ka nënshkruar marrëveshje me më shumë se një duzinë kompanish evropiane të mbrojtjes për furnizimin me radarë, sisteme udhëzuese dhe komponentë të tjerë për projektin e mbrojtjes kundëraketore “Freyja”.

Qëllimi kryesor i këtij projekti është t’i ofrojë Ukrainës një alternativë vendase dhe më të arritshme ndaj sistemit amerikan të mbrojtjes ajrore Patriot.

/rtsh.al/