Pentagoni dhe Lockheed Martin kanë arritur një marrëveshje për 850 avionë F-35. Palët nuk specifikuan vlerën e marrëveshjes, e cila vjen në një kohë kur Pentagoni kërkon të lidhë kontrata shumëvjeçare për të zgjeruar prodhimin e armëve amerikane dhe për të forcuar bazën industriale të mbrojtjes së SHBA-së.

Njoftimi “përforcon rolin e avionit si luftëtari kryesor i vijës së parë të botës së lirë për vitet e ardhshme”, deklaroi Jim Taiclet, kryetar, president dhe CEO i Lockheed, gjatë një telefonate me investitorët.

Avionët F-35 – të cilët forcat e Uashingtonit i kanë përdorur në luftë gjatë konfliktit amerikan-izraelit kundër Iranit – vijnë në tre versione që mund të kushtojnë më shumë se 100 milionë dollarë secili.

“Marrëveshja kuadër”, e cila sipas Pentagonit do të “modernizojë dhe zgjerojë” programin F-35, ende kërkon miratimin e Kongresit dhe financimin përkatës.

“Ne kemi ndryshuar në mënyrë themelore mënyrën se si stabilizojmë bazën industriale amerikane të mbrojtjes për të prodhuar me shpejtësi dhe në shkallë të gjerë”, tha zyrtari i lartë i blerjeve Michael Duffey në njoftimin e Pentagonit.

“Duke përafruar stimujt financiarë me performancën reale, ne po sigurojmë që luftëtarët tanë të pajisen me aftësitë vdekjeprurëse që u nevojiten për të luftuar dhe fituar”, shtoi Duffey.

F-35, një projekt i përbashkët mes Shteteve të Bashkuara dhe disa aleatëve, është një nga avionët ushtarakë më të përparuar në botë. Sipas Lockheed, ka më shumë se 1.375 avionë F-35 të vendosur anembanë globit.

Nëse miratohet, marrëveshja do t’i japë Uashingtonit një program “të parashikueshëm, të përballueshëm dhe elastik” për avionët luftarakë, tha Lockheed, duke theksuar miliarda dollarë kursime të pritshme falë “çmimeve afatgjata dhe zbritjeve të volumit industrial”.

Në këmbim të angazhimit 10-vjeçar të Pentagonit, Lockheed Martin do të financojë 7 miliardë dollarë projekte që mbështesin F-35-të, tha Pentagoni.

“Me sigurinë më të madhe që vjen nga qasja transformuese e qeverisë amerikane ndaj prodhimit dhe mirëmbajtjes së F-35, ne mund të bëjmë investimet e nevojshme paraprake për të zgjeruar kapacitetin, për të përmirësuar efikasitetin dhe për të ndërtuar një zinxhir furnizimi më elastik”, deklaroi Taiclet në një komunikatë.

“Kjo është e mirë për taksapaguesin, e mirë për furnizuesit tanë dhe, më e rëndësishmja, e mirë për Shtetet e Bashkuara dhe aleatët e tyre”, shtoi ai.

Përveç vetë avionëve F-35, marrëveshja mbulon edhe “pjesët fillestare rezervë, komplete modifikimi për 10 vjet dhe mirëmbajtjen, si dhe porositë e klientëve ndërkombëtarë”, tha Lockheed.

/rtsh.al/