Kinematografia botërore ka humbur një nga figurat më të spikatura të ekranit të madh dhe atij televiziv. Aktori fitues i çmimit Emmy, Tom Skerritt, i njohur për interpretimet e tij të fuqishme si instruktori i fluturimit në filmin kult “Top Gun”, kapiteni i anijes hapësinore në “Alien” apo sherifi i drejtë në serialin “Picket Fences”, ka ndërruar jetë në moshën 93-vjeçare.

Sipas njoftimit zyrtar të dhënë nga familja e tij, aktori u nda nga jeta të mërkurën për shkaqe natyrore. Përmes një deklarate prekëse, familjarët e tij nëvizuan përmasën njerëzore të artistit përtej famës artistike.

“Ndërsa bota e njihte Tomin përmes karrierës së tij të jashtëzakonshme si aktor, ne e njihnim atë për humorin, kuriozitetin, mençurinë, bujarinë dhe dashurinë që solli në jetën tonë. Ai kujdesej thellësisht për imagjinatën, kreativitetin, rrëfimin e historive, shërbimin, veteranët, botën natyrore dhe ndihmën e të tjerëve për të gjetur dhe ndarë zërat e tyre”, shkruhet në reagimin e familjes.

Gjatë karrierës së tij të gjatë e të larmishme, Skerritt u vlerësua dy herë me nominim për çmimet Emmy, duke fituar trofeun për aktorin më të mirë protagonist në një serial dramatik në vitin 1993 për rolin e tij në “Picket Fences”. Ai la gjurmë të thella në kinematografi edhe përmes interpretimeve në filma si “Steel Magnolias”, “A River Runs Through It” nën regjinë e mikut të tij Robert Redford, si dhe në filmin fantastiko-shkencor “Contact”.

Vetë aktori e përshkruante me modesti dhe inteligjencë pozicionin e tij në industri, duke kujtuar një përcaktim që i kishin bërë kritikët: “Një shkrimtar më përshkroi dikur si një aktor personazhesh të mbyllur në trupin e një aktori kryesor dhe gjithmonë e kam dashur këtë. Është një kompliment i mirë. Kam qenë në gjendje të eci në vijën ndarëse midis televizionit dhe repertorit artistik”.

Rruga e tij drejt suksesit filloi pasi shërbeu katër vjet në Forcat Ajrore të SHBA-së dhe studioi regji filmi në UCLA, i frymëzuar nga klasiku “Citizen Kane”. Pas debutimit të tij në vitin 1962 me filmin “War Hunt”, karriera e tij mori vrull në fund të viteve ’70 me rolin e kapitenit Nostromo në “Alien” – ku ai çmonte faktin se skenari sfidonte klishtetë e kohës duke e shndërruar protagonisten femër në heroinë – si dhe me rolin e paharrueshëm si instruktor i Tom Cruise në “Top Gun”.

Tom Skerritt la pas gruan e tij, Julie Tokashiki, si dhe pesë fëmijët e tij, duke lënë pas një trashëgimi të pasur artistike në teatër, televizion dhe filmin amerikan.

/rtsh.al/