Qeveria franceze njoftoi se 70 mijë forcave të policisë dhe sigurisë do t’u kërkohet të mobilizohen në të gjithë vendin të shtunën, me qëllim parandalimin e përsëritjes së dhunës dhe plaçkitjeve që shpërthyen gjatë demonstratave të fundjavës së kaluar.

Ky vendim vjen pasi grupet e nxënësve të shkollave të mesme, të cilët nisën këtë lëvizje proteste përpara një muaji, zhvilluan një takim me Presidentin Emmanuel Macron të premten dhe u bënë thirrje anëtarëve të tyre të vazhdojnë mobilizimin derisa kërkesat e tyre të plotësohen.

Kriza aktuale ka shtyrë presidentin Macron të ndryshojë agjendën e tij ndërkombëtare, duke pezulluar vizitat e planifikuara zyrtare në Nigeri dhe Senegal. Ai zhvilloi një mbledhje urgjente të këshillit të mbrojtjes me ministrat dhe zyrtarët më të lartë të sigurisë, si dhe u takua për herë të parë me përfaqësuesit e nxënësve.

Megjithatë, përfaqësuesi studentor Nathanael Combary, kryetar i grupit “High School Renewal”, u shpreh pas takimit se ndonëse presidenti tregoi vëmendje, përfaqësuesit nuk janë të kënaqur dhe mbeten në pritje të propozimeve konkrete gjatë bisedimeve të ardhshme me kryeministrin, ndaj i nxiti të rinjtë të mbajnë trysninë mbi pushtetin.

Nisma që filloi si një revoltë e nxënësve për kushtet e mësimdhënies dhe mungesat në arsim është shndërruar tashmë në një lëvizje më të gjerë mbarëkombëtare, e ushqyer nga pakënaqësia e përgjithshme ndaj rritjes së kostos së jetesës.

Ministri i Brendshëm, Laurent Nunez, paralajmëroi se në rrjetet sociale po qarkullojnë thirrje për akte të reja dhune, ndërsa qeveria po përpiqet të bëjë një ndarje të qartë mes të drejtës legjitime për të protestuar dhe akteve kriminale të plaçkitjes apo djegieve.

Përgjigjja shtetërore ndaj trazirave ka qenë e menjëhershme dhe e rreptë. Ministri i Drejtësisë, Gérald Darmanin, bëri të ditur se gjykatat kanë dërguar në burg 217 persona, prej të cilëve gjysma nuk kishin precedentë të mëparshëm penalë.

Nga ana e tij, Presidenti Macron kërkoi ashpërsi maksimale ndaj delikuencës, duke akuzuar grupet e “ultra-së majtës” për përpjekje për të dëmtuar rendin republikan.

Për të shmangur përshkallëzimin, autoritetet kanë vendosur kufizime të rrepta gjeografike për protestat e të shtunës. Në Paris, marshimi do të lejohet vetëm përgjatë një aksi të caktuar mes shesheve Bastille dhe Nation, ndërsa institucione kryesore kulturore si muzeu i Luvrit do të qëndrojnë të mbyllura. Kufizime të ngjashme janë zbatuar në Lion dhe Orléans, ndërsa në Marsejë është dhënë leje vetëm për një demonstratë të organizuar nga sindikatat.

Këto masa sigurie dhe ndalime demonstratash kanë nxitur reagime nga organizatat ndërkombëtare të të drejtave të njeriut. Amnesty International kritikoi ashpër ato që i cilësoi si praktika me prirje autoritare që cenojnë të drejtën e protestës paqësore, ndërsa Human Rights Watch rikujtoi se forcat e rendit kanë për detyrë të garantojnë sigurinë e tubimeve paqësore, duke shprehur njëkohësisht shqetësim për raportimet mbi lëndimet e shkaktuara nga pajisjet e kontrollit të turmave.

Trazirat po zhvillohen në një moment mjaft kritik politik dhe ekonomik për Francën, gjashtë muaj përpara zgjedhjeve presidenciale. Anketimet e fundit tregojnë se situata e tensionuar ka forcuar pozitën e kandidates së të djathtës ekstreme, Marine Le Pen, e cila kryeson sondazhet e opinionit publik, ndërsa shqetësimet për borxhin shtetëror po ndikojnë negativisht edhe te investitorët e huaj.

/rtsh.al/