Një aksident i rëndë rrugor me pasojë vdekjen ka ndodhur mbrëmjen e sotme në periferi të qytetit të Shkodrës. Një automjet ka dalë nga rruga duke u përplasur fatalisht, e për pasojë i ka marrë jetën drejtuesit të tij.

Sipas të dhënave paraprake nga Drejtoria Vendore e Policisë Shkodër, ngjarja u regjistrua rreth orës 19:25 në një rrugë dytësore përgjatë aksit “Shtoj – Ish-Reparti Ushtarak”. Viktima, i identifikuar nga autoritetet me inicialet N. K., ishte duke udhëtuar me automjetin e tij kur, në rrethana ende të paqarta, ka humbur kontrollin mbi drejtimin e mjetit.

Mungesa e kontrollit ka bërë që makina të devijojë papritur nga karrexhata. Përplasja ka qenë tepër e fortë, pasi automjeti është përplasur fillimisht me një shtyllë anë rrugës dhe më pas me një mur rrethues të një objekti aty pranë.

Për shkak të goditjes së fuqishme, shtetasi N. K. ka marrë lëndime të rënda dhe, fatkeqësisht, ka humbur jetën në vendin e ngjarjes, pa mundur të marrë ndihmën e specializuar mjekësore.

Në vendngjarje kanë mbërritur menjëherë forcat e Policisë Rrugore dhe një ambulancë. Aktualisht, aty ndodhet një grup i posaçëm hetimor, i cili po kryen matjet topografike dhe po mbledh provat materiale.

/rtsh.al/