Në Bashkinë e Tepelenës vijojnë aplikimet për përfitimin nga Paketa e Maleve. Deri më tani janë regjistruar rreth 56 aplikime, ndërsa 19 prej tyre, të cilat kanë plotësuar kriteret e përcaktuara, janë miratuar edhe nga Këshilli Bashkiak.

“Paketën e maleve deri tani janë rreth 56 aplikime, të cilat kanë ardhur në sistemin nëpërmjet sistemit e-Albania. Janë shqyrtuar aplikimet rast pas rasti. Grupi i parë i aplikimeve që kanë përmbushur dhe kriteret sipas ligjit për paketën e maleve dhe akteve nënligjore janë miratuar në këshillit bashkiak lista për 19 aplikime”, u shpreh përfaqësues i Bashkisë Tepelenë, Gëzim Shehu.

Aplikimet për Paketën e Maleve vijojnë edhe në këtë bashki, ndërsa qytetarët dhe subjektet e interesuara mund të informohen pranë strukturave përkatëse për kriteret dhe dokumentacionin e nevojshëm për të përfituar.

“Puna në terren nuk ka filluar akoma duke qenë që pas miratimit të këshillit bashkiak ka vazhduar procedura me aplikimin në Agjencinë Shtetërore të Kadastrës për regjistrimin në kartelën e pasurisë të poseduesit jo pronar dhe pasi të pajiset me kartelën e pasurisë do bëhen aplikimet për lejen e zhvillimit pastaj të tjerat duke marrë tokën nga ministria përkatëse dhe të vazhdojnë me punimet.

Aplikimet vazhdojnë si në sistem dhe ne duke marrë aplikimet dhe jemi në procedurë tjetër tani dhe për ato aplikime që kanë ardhur së fundmi duke verifikuar dokumentacionin përmbushjen e kritereve duke nisur shkresat përkatëse në institucionet e përcaktuara dhe duke bërë afishimin publik e cila duhet të jetë për 45 ditë e afishuar në fshatin ku ndodhet prona dhe në bashkisë”, tha ai.

Paketa e Maleve synon të nxisë zhvillimin ekonomik të zonave malore përmes mbështetjes së investimeve dhe nismave të reja. Në Bashkinë e Tepelenës, vijimi i aplikimeve pritet të krijojë mundësi për më shumë projekte dhe investime në territor, në funksion të zhvillimit të qëndrueshëm të këtyre zonave.

Gazetare: Enkeleda Domeri

/rtsh.al/